ساحل آن لائن کی جانب سےقائد قوم ڈاکٹر ایس ایم سید خلیل الرحمن کی تہنیت
بھٹکل:26/ جولائی(ایس او نیوز)دبئی اور ریاست کرناٹکا کی مشہور ومعروف شخصیت اورقائد قوم ڈاکٹرایس ایم سید خلیل الرحمن کو حال ہی میں آئرلینڈ کی الڈرسگیٹ یونیورسٹی کی جانب سےدبئی میں منعقدہ شاندار اجلاس میں شعبہ تعلیم اورعوامی خدمات کے اعتراف میں پی ایچ ڈی (ڈاکٹریٹ) کی ڈگری تفویض کی گئی تھی، جس پرساحل آن لائن میڈیااینڈ پبلشنگ سوسائٹی کی طرف سے ان کی رہائش گاہ پر شال اوڑھا کر عزت بخشتے ہوئے تہنیت کی گئی ۔
اس موقع پر گفتگو کرتے ہوئے ساحل آن لائن میڈیا اینڈ پبلیشنگ سوسائٹی کے جنرل سکریٹری اور میجنگ ایڈیٹر عنایت اللہ گوائی نےبتایا کہ ڈاکٹر ایس ایم سید خلیل الرحمن ملک کے کئی ایک تعلیمی اور سماجی اداروں سے منسلک ہیں اورموصوف قوم وملت کی بے لوث خدمات انجام دے رہے ہیں۔ انہوں نے اس بات پر خوشی اور فخر کا اظہار کیا کہ موصوف ساحل آن لائن کے بھی چیرمین ہیں اوربھٹکل میں ساحل آن لائن میڈیا کو مضبوط کرنے اور اس کے ثمرات سے قوم وملت کو مستفید کرنے میں اہم رول ادا کررہے ہیں۔ سوسائٹی کے ڈائرکٹر جناب قمر سعدا نے موصوف کی خدمات کا اعتراف کرتے ہوئے کہا کہ قومی اور تعلیمی تاریخ میں ڈاکٹر سید خلیل الرحمن کا نام سنہرے حرفوں میں لکھا جائے گا ، انہوں نے اللہ تعالیٰ سے دُعا کی کہ اُن کی عمر میں درازی دے اوراللہ تعالیٰ انہیں مزید قوم وملت کی خدمت کرنے کا موقع عنایت کرے، صحت اور تندرستی عطا فرمائے۔
ساحل آن لائن شعبہ کنڑا کے نائب مدیر محمد رضامانوی، مینجر مبشر حسین ہلارے ،مارکٹنگ شعبہ کے یحییٰ ہلارے، دیگر اسٹاف منجونائک مٹھلی ، محمد امین زہیب، قمر الزماں ، محمد فائق ، مہیمن سعدا وغیرہ موجود تھے۔