ملک کے مشہور کارڈیالوجسٹ ڈاکٹر علی فیضل کا ساحل آن لائن دفتر دورہ؛ بھٹکل میں طبی خدمات فراہم کرنے پر غور
بھٹکل 30/جولائی (ایس او نیوز) بھٹکل ویلفئیر اسپتال میں میترا اسپتال کے اشتراک سے دو روزہ امراض قلب کا فری چیک آپ و علاج کیمپ کے ساتھ ساتھ رابطہ ہال میں بھٹکل مسلم خلیج کونسل کے اشتراک سے منعقدہ پروگرام کے کامیاب انعقاد کے بعد ملک کے مشہور کارڈیالوجسٹ اور میترا اسپتال کے ڈائرکٹر اینڈ چیف آف کلینکل سروس ڈاکٹر علی فیضل نے اتوار شام کو ساحل آن لائن دفتر کا دورہ کیا اور مینجنگ ایڈیٹر جناب عنایت اللہ گوائی سمیت پوری ٹیم کا شکریہ ادا کیا۔ انہوں نے کہا کہ بھٹکل میں ان کا اتنا بہترین استقبال ہوگا اور امراض قلب کے اتنے زیادہ مریض یہاں ہوں گے یہ سوچا نہیں تھا۔ انہوں نے کہا کہ چھ ماہ بعد پھر اسی طرح کا کیمپ بھٹکل میں رکھنے کے تعلق سے سوچا جاسکتا ہے مگر آئندہ ایسے کیمپ کے لئے دو سے زائد ڈاکٹرس کو بلانا ضروری ہوگا۔ موقع پر موجود سعودی عربیہ کے کامیاب اور نامور تاجر اور بھٹکل مسلم خلیج کونسل کے جنرل سکریٹری جناب محمد یونس قاضیا صاحب کا بھی انہوں نے بھرپور شکریہ ادا کیا ، جن کے بنگلے میں ان کی رہائش کا انتظام تھا اور موصوف کی مہمان نوازی قابل تعریف تھی۔
ڈاکٹر علی فیضل نے واضح کیا کہ بھٹکل کے قریب منی پال اور مینگلور میں میڈیکل کی اچھی سہولیات ہیں، لہٰذا مریضوں کو وہاں لے جایا جاسکتا ہے، البتہ کالی کٹ میترا اسپتال میں اگر بھٹکل کے کوئی مریض آتے ہیں تو اُن کو خصوصی سہولت فراہم کرنے ہر ممکن کوشش کی جائے گی، اسی طرح جو لوگ کیمپ میں شریک ہوئے تھے، وہ اگر علاج کے لئے میترا اسپتال کا رُخ کرتے ہیں تو اُنہیں علاج معالجہ پر خصوصی رعایت دی جائے گی۔ ماہر قلب ڈاکٹر علی فیضل نے بتایا کہ بھٹکل میں طبی خدمات فراہم کرنے کے تعلق سے شہر کے ذمہ داران سے گفتگو ہوئی ہے اس تعلق سے ہم یہاں کے ذمہ داران کو ہر طرح کا تعاون فراہم کرنے کے لئے تیار ہیں۔
بھٹکل میں دو کامیاب پروگرام کے بعد ڈاکٹر علی فیضل نے ویلفیر اسپتال کے ذمہ داران بالخصوص ڈاکٹر ظہیر کولا اور ابوالاعلیٰ برماور کا شکریہ ادا کیا، اسی طرح انہوں نے بھٹکل مسلم خلیج کونسل کے ذمہ داران کا بھی شکریہ ادا کیا۔
ساحل آن لائن دفتر میں استفسار پر جناب عنایت اللہ گوائی نے ساحل آن لائن کا تعارف اور اس کے اغراض و مقاصد کو مختصراً پیش کیا، اس موقع پر ساحل ا ٓن لائن کی جانب سے اپنا قیمتی وقت نکال کر بھٹکل میں منعقدہ ہارٹ چیک آپ کیمپ میں شریک ہوکر لوگوں کا مفت علاج کرانے پر ڈاکٹر علی فیضل، ڈاکٹر شاج الدین اور مینجر مُرلی تھراوٹ کی شال پوشی کرتے ہوئے تینوں کو میمنٹو پیش کیا گیا اور تہنیت کی گئی۔
اس موقع پر جناب محمد یونس قاضیا سمیت ساحل آن لائن کے ڈائرکٹرس جناب جیلانی محتشم، جناب محمد یوسف برماور، جناب محمد قمر سعدا سمیت ساحل آن لائن کے آفس اسٹاف جناب مبشر حُسین ہلارے، جناب یحیٰ ہلارے، حافظ امین ذُھیب دامودی، مولوی محمد صفوان موٹیا و دیگر بہت سارے احباب موجود تھے۔
قارئین کو یہ بتاتے چلیں کہ قریب دس سال قبل ڈاکٹر علی فیضل کی قیادت میں ہی ساحل آن لائن کے مینجنگ ایڈیٹر جناب عنایت اللہ گوائی کی کالی کٹ کے میمس اسپتال میں کامیاب اوپن ہارٹ سرجری ہوئی تھی، جبکہ قریب دو سال قبل ڈاکٹر علی فیضل سمیت ان کی پوری ٹیم نے کالی کٹ میں نہایت ہی اعلیٰ پیمانے پر میترا اسپتال کی بنیاد رکھی ۔