بھٹکل 22/ جون (ایس او نیوز) مرکزی خلیفہ جماعت المسلمین بھٹکل  کے نائب صدرجناب ایس ایم سید محی الدین مارکیٹ صاحب اب مرکزی خلیفہ جماعت المسلمین بھٹکل کے  صدر منتخب ہوئے ہیں۔ پیر کو جماعت کے دفتر میں منعقدہ انتظامیہ میٹنگ میں  انہیں اس عہدہ کےلئے بالاتفاق رائے منتخب کیا گیا۔ یاد رہے کہ خلیفہ جماعت المسلمین کے  صدر جناب صدیق محمد میراں صاحب گذشتہ ماہ  انتقا ل کرگئے تھے  ، جس کے بعد پیر 21  جون کو منعقدہ  انتظامیہ میٹنگ میں  جناب ایس ایم سید محی الدین مارکیٹ صاحب کو  اس اہم عہدہ  کے لئے  منتخب کیا گیا۔

 جناب سید محی الدین صاحب طویل مدت سے اس جماعت  کے ذمہ داران میں شامل ہیں، ساتھ ساتھ آپ   جامعہ اسلامیہ بھٹکل کے ارکان شوری ، مجلس اصلاح و تنظیم کے  سرپرست جبکہ قومی تعلیمی ادارہ انجمن حامئی مسلمین بھٹکل کی  بھی مجلس انتظامیہ کے رکن ہیں۔ آپ مدراس جماعت کے بھی صدر ہیں۔

جماعت کی انتظامیہ کی اس اہم میٹنگ میں جناب سعدا محمد میراں صاحب کو مرکزی خلیفہ جماعت المسلمین بھٹکل کے  عہدہ سرپرست  کے لئے  منتخب کیا گیا ہے۔ موصوف  مرکزی خلیفہ جماعت المسلمین بھٹکل کی گذشتہ میعاد میں  جنرل سکریٹری کے عہدہ پر فائز رہ کرخاموش طبیعت کے ساتھ خداد اد صلاحیتوں کے ذریعہ کئی منصوبوں کو بروئے کار لاتے ہوئے  جماعت کے استحکام و ترقی میں  نمایاں کردار ادا کیا تھا، موصوف اس سے قبل  دو میعاد میں سکریٹری کے عہدہ پربھی رہ کر خدمات انجام دے چکے  ہیں۔