سرسی۔ کمٹہ شاہراہ پر12 اکتوبر سے 18مہینوں تک ٹریفک رہے گی بند۔ ’بھارت مالا ‘منصوبے کے تحت ہورہی ہے سڑک کی تعمیر
کاروار،10؍اکتوبر (ایس او نیوز) ڈپٹی کمشنر ڈاکٹر ہریش کمار کی طرف سے جاری ایک بیان کے مطابق مرکزی حکومت کے ’بھارت مالا‘منصوبے کے پہلے مرحلے کے تحت بیلے کیری بندرگاہ سے رابطہ قائم کرنے کی غرض سے سرسی کمٹہ ریاستی شاہراہ کو ترقی دے کر نیشنل ہائی وے میں تبدیل کیا جارہا ہے جس کی وجہ سے 12کتوبر سےآئندہ 18مہینوں تک سڑک کو موٹر گاڑیوں کی آمد ورفت کے لئے بند رکھا جائے گا۔
ضلع ڈی سی نے ضلع میجسٹریٹ کے طورپر جو حکم جاری کیا ہے، اس میں کہا گیا ہے کہ کمٹہ سے سرسی کی طرف آنے جانے والی ہلکی موٹر گاڑیوں کے لئے سداپور اسٹیٹ ہائی وے 69کے ذریعےسفر کرنا ہوگا، جبکہ انکولہ سےسرسی کی طرف آنے جانے والی تمام قسم کی موٹر گاڑیوں کو یلاپورکے نیشنل ہائی وے 63کا استعمال کرنا ہوگا۔ اسی طرح منگلورو سے سرسی کی طرف آنے جانے والی ہر قسم کی موٹر گاڑیوں کو ہوناور، ماوین گُنڈی اور سداپورکے راستے نیشنل ہائی وے 93پر سفر کرنا ہوگا۔اس پابندی اور ٹریفک کا راستہ بدلنے کی اسکیم کا اطلاق 12اکتوبر سے ہی ہوگا۔
خیال رہے کہ کمٹہ سرسی روڈ کو ترقی دینے اور تعمیر نو کا جو منصوبہ ہے اس کی تکمیل کے لئے 18 مہینوں کی میعاد مقرر کی گئی ہے۔