کاروار میں ’روڈ سیفٹی ویک‘کا آغاز ۔ ٹریفک قوانین سے آگاہی اور سڑک حادثات سے بچنے کے لئے چلائی گئی عوامی بیداری مہم
کاروار،24؍نومبر (ایس او نیوز) ضلع محکمہ پولیس، کاروار سٹی و مضافاتی پولیس اور ٹریفک پولیس نے قوانین سے آگاہی ، موٹر گاڑی سواروں کی حفاظت اور سڑک حادثات بچنے کے لئے ’روڈ سیفٹی ویک‘ کا آغاز کیا جس کے دوران عوام میں اپنی جان کی حفاظت کے تعلق سے بیداری مہم چلائی جائے گی۔
شہر کے سبھاش سرکل پر پولیس سپرنٹنڈنٹ شیوا پرکاش دیوراج نے ’روڈ سیفٹی ویک‘ کا آغاز کیا۔ پولیس والوں نے بغیر ہیلمیٹ والے دو پہیہ گاڑی سواروں روک کرگلاب کے پھول پیش کرتے ٹریفک قوانین کی پابندی کرنے اور آئندہ بغیر ہیلمیٹ کے باہر گاڑی پر سواری نہ کرنے کی تنبیہ کی۔خیال رہے کہ سڑک پر چلتے اور سواری کرتے ہوئے اپنے اور دوسرے کی جان کی حفاظت خاطرٹریفک قوانین کی پابندی کرنے کے سلسلے میں بیداری لانے 23سے 30نومبر تک یہ ہفتہ منایا جائے گا۔
اس موقع پر ایس پی شیواپرکاش دیوراج نے بتایا کہ لوگ پوچھتے ہیں کہ صرف پانچ منٹ کے لئے گھر سے باہر جانا ہے تو پھر ہیلمیٹ پہننے کی کیاضرورت ہے۔ لیکن یاد رکھنا چاہیے کہ اسی پانچ منٹ کے اندر زندگی اور موت کافاصلہ بھی ختم ہوسکتا ہے۔کون گارنٹی دے سکتا ہے کہ انہی پانچ منٹوں میں حادثہ پیش نہیں آئے گا اورجان سے ہاتھ دھونا نہیں پڑے گا؟ کیونکہ ان پانچ منٹوں میں ہی جان لیوا حادثات ہونے اور جان سے جانے کے کئی واقعات ریکارڈ پر موجود ہیں۔
ایس پی نے کہا کہ ضلع شمالی کینرا میں ہر سال کم از کم 300حادثات ہوتے ہیں اور 300کے قریب جانیں چلی جاتی ہیں۔ افسوس کی بات یہ ہے کہ خطرناک حادثات میں زیادہ تر نوجوان ہی ہلاک ہورہے ہیں۔ اس لئے عوام اور خاص کرکے نوجوانوں کے اندر ٹریفک قوانین کی پابندی اور اپنی حفاظت کی تعلق سے بیداری لانا بہت ضروری ہے۔ انہوں نے واضح کیا کہ سرکاری طور پر چاہے جتنی بیداری مہم چلائی جائے، لیکن جب تک عوام خود اپنی حفاظت کا خیال نہیں رکھیں گے اور قوانین کی پابندی نہیں کریں گے ، خطرناک حادثات اور جان و مال کے نقصان سے بچنا ممکن نہیں ہوگا۔
اس موقع پر ایڈیشنل ایس پی بدری ناتھ، ڈی وائی ایس پی اروند کلگوجّی، سرکل پولیس انسپکٹر سنتوش شیٹی، کاروار سٹی پولیس اسٹیشن کے ایس آئی سنتوش کمار، مضافاتی پی ایس آئی این ڈی جکنا ور کے علاوہ پردیپ یوتھ کلب کے اراکین ، آٹو رکشہ ڈرائیورس اور کچھ عام لوگ موجود تھے۔