بھٹکل 12 مارچ (ایس او نیوز)  بھٹکل مین روڈ پر  دوڑنے والی الیکٹرک اسکوٹر کو اچانک آگ لگ جانے سے  اسکوٹر کی بیٹری سمیت تمام وائرنگ جل کر خاکستر ہوگئی، البتہ  شک کی بنیاد پر احتیاطی اقدام کے طور پر  اسکوٹرسوار نے اسکوٹر کو کنارے پارک کردیا، جس سے اسکوٹر سوار بال بال  بچ گیا۔ ورنہ اُس کی جان کو بھی خطرہ ہوسکتا تھا۔

واردات  منگل کو   نشیبی علاقوں سے سرکل کی طرف جانے والی مین  سڑک  پر  پیش آئی۔ اسکوٹر سوار    ناگراج موگیر نے بتایا کہ  وہ  نیچے بس اسٹینڈ سے سرکل کی طرف جارہا تھا کہ اچانک سیٹ پر گرمی محسوس ہوئی، چونکہ الیکٹرک اسکوٹر اور الیکٹرک کار کو اچانک آگ لگنے کی خبریں سنتاآرہا تھا، اس لئےشک کی بنیاد پر فوراً اسکوٹر کو کنارے کیا اور  سیٹ کو اوپن کیا تو  یہ دیکھ کر دنگ رہ گیا کہ بیٹری میں آگ لگی ہوئی ہے۔  اس سے پہلے کہ آگ تیزی سے پھیلتی ہوئی پوری اسکوٹر کو اپنی لپیٹ میں لیتی،  مقامی لوگوں  نے مدد کی اور بیٹری والے حصے پر پانی ڈالنا شروع کردیا۔ اطلاع ملتے ہی  فائر بریگیڈ بھی موقع پر پہنچ گئی اور آگ پر قابو پالیا گیا۔

الیکٹرک اسکوٹر چائنیس کمپنی  Benling کی ہے اور اسکوٹر پر BENLNG AURA درج  ہے،جبکہ اسکوٹر مالک  ناگراج موگیر، تعلقہ کے مُنڈلی کا رہائشی ہے۔

بتاتے چلیں کہ پٹرول کے بڑھتے دام کو دیکھتے ہوئے  آج کل لوگ الیکٹرک اسکوٹر اور الیکٹرک کار خریدنے میں زیادہ دلچسپی لے رہے ہیں، لیکن الگ الگ شہروں سے   الیکٹرک اسکوٹروں او ر الیکٹرک کاروں میں اچانک آگ لگنے  کی وارداتیں بھی  وقفے وقفے سے  سامنے آتی رہی ہیں، اس لئے الیکٹرک گاڑیاں  چلاتے وقت  احتیاط برتنا بے حد ضروری ہے۔