بھٹکل تعلقہ پنچایت کی کے ڈی پی میٹنگ میں رکن اسمبلی کا غافل افسران کے خلاف سخت رویہ : کام نہیں کرسکتے تو میٹنگ میں حاضری کس لئے ؟
بھٹکل:28؍جون(ایس اؤ نیوز)عوامی کاموں کی طرف توجہ نہ دینے والے ، کام کےمتعلق صحیح جانکاری نہ رکھنے والے افسران میٹنگ میں حاضری کیوں دیتے ہیں، اگر ڈھنگ سے کام کرنا نہیں آتاہے تو کیوں آتے ہو،نکل جاؤ باہرکہتے ہوئے بھٹکل ہوناور رکن اسمبلی سنیل نائک نے جمعرات کو پنچایت ہال میں منعقد ہ کے ڈی پی کی سہ ماہی میٹنگ میں افسران کو آڑے ہاتھوں لیا۔
میٹنگ کے دوران رکن اسبملی سنیل نائک نے گزشتہ ایک سال سے زیر تعمیر بھٹکل اور مرڈیشور بس اسٹانڈ کے مسائل حل نہ ہونے پر ناراضگی کا اظہار کرتے ہوئے متعلقہ محکمہ کے افسر سے جانکاری چاہی۔محکمہ ٹرانسپورٹ کے سوپروائزر شری دھر بھٹ جب وضاحت کے لئے کھڑے ہوئے تو رکن اسمبلی نے اعتراض جتاتے ہوئے پوچھا کہ آپ کے اعلیٰ افسرکہاں ہیں؟کیا آپ میرے سوالوں کا جواب دینے کے اہل ہیں تو میٹنگ میں رہیں ورنہ باہر نکل جائیں کہا۔ شری دھر بھٹ نے حامی بھرتے ہوئے کھڑے ہوگئے۔ محکمہ نقل وحمل کے متعلق بہت سارے اعتراضات کی وجہ سے ناراض رکن اسمبلی نے بھٹکل اور مرڈیشور بس اسٹانڈ کی تعمیر اور صفائی کے متعلق پوچھا اور کہا کہ آپ کو بتاتے ہوئے ایک برس ہوگیا ابھی تک کہانی جیسی کی ویسی ہی ہے۔ مسافروں کو بس اسٹانڈ میں کھڑے ہونا دشوار ہے ، بھٹکل میں تو کوئی انتظامات نہیں ہیں ،مناسب انتظامات کے لئے کتنی مرتبہ کہا گیا ، کچھ بھی نہیں کیاگیا پھر یہاں کیوں آئے ہیں کہتے ہوئے عدم اطمینان کا اظہارکیا۔ محکمہ ٹرانسپورٹ کے افسر کوئی چارہ کار نہ پاتے ہوئے میٹنگ سے باہر نکل گئے۔ رکن اسمبلی نے تعلیمی محکمہ کے متعلق بھی بے اطمینانی کا اظہار کرتے ہوئے کہاکہ چند اساتذہ وقت پر اسکول نہیں آتے ہیں جب جی چاہا تب اسکول کا رخ کرتے ہیں، انہیں کوئی پوچھنے والا ،کہنے والا ہے کہ نہیں ؟ ان حالات میں بچوں کو معیاری تعلیم کیسے دی جائے گی؟ کسی کی سفارش پر دھیان نہ دیں ، بچوں کی خاطر ایسے اساتذہ کے خلاف سخت کارروائی کرنے کی محکمہ تعلیم کے افسرکو تاکید کی۔ بارش کے موسم میں تعلقہ کے بعض اسکولو ں میں پانی بھر نے کی خبریں ہیں وہاں فوری انتظامات کرنے بی ای اؤ منجی کو ہدایت دی۔ محکمہ زراعت میں ٹارپول تقسیم کے مسئلے کو اٹھاتے ہوئے اس تعلق سے جانکاری دینے کو کہا۔ بھٹکل سرکاری اسپتال کے انتظامات کے متعلق بھی گفتگو ہوئی ۔ اس موقع پر انہوں نے فاریسٹ افسران سے کہاکہ کچھ لوگ تعلقہ کے چند مقامات پر جنگل کے علاقوں میں رہائش پذیر ہیں انہیں درختوں کو نقصان پہنچائے بغیر بجلی کنکشن کے لئے منظوری دینےکا مطالبہ کیا۔ میٹنگ میں ضلع پنچایت صدر جئے شری موگیر، تعلقہ پنچایت صدر ایشور نائک ، نائب صدر اشوک رادھا وئیدیا، تحصیلدار وی این باڈکر وغیرہ موجود تھے۔