بینگلورو میں پیش آیا بی جے پی انتخابی ٹکٹ کا ایک اور اسکینڈل - ملزمین کے خلاف درج ہوئی ایف آئی آر
بینگلورو 23 / اکتوبر (ایس او نیوز) ہندوتوا وادی کارکن چیئترا اور اس کی ٹیم کی طرف سے اسمبلی الیکشن میں بی جے پی کا ٹکٹ دلوانے کے نام پر کیا گیا کروڑوں روپے فراڈ کا معاملہ ابھی ٹھنڈا نہیں ہوا کہ وجیا نگر سے ایک اور اسکینڈل سامنے آیا ہے جس میں ایک شخص کو بی جے پی کا ٹکٹ دلانے کا لالچ دیتے ہوئے کروڑوں روپے کا چونا لگایا گیا ہے ۔
وجیا نگر ضلع کے کوٹور کے رہنے والے پی ڈبلیو ڈی ریٹائرڈ انجینئر شیوا مورتی نے پولیس کے پاس جو شکایت درج کروائی ہے اس کے مطابق پتور کے ایک بی جے پی لیڈر ریونا سدپّا نے ہاگری بومنہلّی سے ایس سی ریزور سیٹ پر الیکشن لڑنے کے لئے بی جے پی کا ٹکٹ دلانے کی بات کہہ کر اس سے 2 کروڑ 55 لاکھ روپے ہتھیا لیے ۔ اسکینڈل میں موہن کٹاریا اور شیکھر پورشوتم نیرلاکٹے افراد بھی شامل ہیں ۔
شیوامورتی کا کہنا ہے کہ پارٹی کے ریاستی صدرنلین کمار کٹیل نے ٹکٹ کے سلسلے میں شیکھر سے براہ راست رابطہ قائم کرنے کی ہدایت دی تھی اس لئے کٹیل کی بات پر بھروسہ کرتے ہوئے اس نے مرحلہ وار دو کروڑ پچپن لاکھ روپے ادا کیے تھے ۔ بینگلورو کے بی جے پی دفتر میں بات چیت طے ہوئی تھی ۔
شیوامورتی کے بیان کے مطابق جب ٹکٹ نہیں ملی تو اس نے رقم واپسی کا مطالبہ کیا ۔ اس پر ملزمین نے 90 لاکھ روپے کا چیک دیا تھا جو 10 اکتوبر کو واجب الادا تھا مگر وہ چیک باونس ہوگیا ۔ اب رقم واپسی کا مطالبہ کرنے پر اسے جان سے مارنے کی دھمکیاں دی جا رہی ہیں ۔
فراڈ کا شکار ہوئے شیوامورتی نے وزیر اعلیٰ کو مراسلہ بھیج کر مطالبہ کیا ہے کہ اس معاملے کو سی آئی ڈی کے حوالے کرتے ہوئے مکمل تحقیقات کروائی جائے ۔ اس کے علاوہ انسپکٹر جنرل آف پولیس آلوک موہن کو بھی کے پاس بھی شکایت درج کروائی ہے ۔
کوٹور پولیس نے شیوامورتی کی شکایت پر ایف آئی آر درج کرتے ہوئے اس معاملہ کی تحقیقات شروع کی ہے ۔
