لارڈس،7؍جولائی (ایس او نیوز؍ایجنسی) لارڈس کے تاریخی میدان پر پاکستان نے بنگلہ دیش کو شکست دے کر عالمی کپ 2019 مہم کا اختتام کیا۔ اسی کے ساتھ پاکستان کے قدآور بلے باز اور سابق کپتان شعیب ملک نے بھی اپنے بین الاقوامی کرکٹ سے ریٹائرمنٹ کا اعلان کر دیا ہے۔
بتا دیں کہ 37 سالہ شعیب ملک کی کارکردگی اس عالمی کپ میں انتہائی خراب رہی تھی اور پاکستانی میڈیا میں انھیں لگاتار تنقید کا نشانہ بنایا جا رہا تھا۔ شعیب کے شیدائی بھی ان کی کارکردگی سے خوش نہیں تھے اور سوشل میڈیا پر ان کے خلاف کارٹون بھی وائرل ہو رہے تھے۔ لیکن جب پاکستان کو ٹیم انڈیا نے شکست سے دوچار کیا تو انھیں ٹیم سے ڈراپ کردیا گیا اور جب آخری میچ میں پلیئنگ الیون میں جگہ نہیں مل پائی تو انہوں نے میچ کے بعد ایک پریس کانفرنس میں اپنی سبکدوشی کا اعلان کردیا۔
پریس کانفرنس کے بعد شعیب ملک نے اپنے ٹوئٹر ہینڈل پر لکھا کہ ’’آج میں ون ڈے انٹرنیشنل کرکٹ سے ریٹائر ہو رہا ہوں۔ میں تمام کھلاڑیوں، کوچز، خاندان کے افراد، دوست احباب، میڈیا نمائندوں اور سپانسرز کا شکریہ ادا کرتا ہوں۔ ان سب سے زیادہ میں اپنے مداحوں کا شکر گزار ہوں جن سے میں بے پناہ محبت کرتا ہوں۔‘‘‘
شعیب ملک کی اہلیہ ثانیہ مرزا نے ان کے سبکدوشی کے اعلان کے بعد ٹوئٹر پر ایک پوسٹ شئیر کیا ہے۔ ثانیہ مرزا نے اس میں ایک حوصلہ افزا اقتباس لکھنے کے ساتھ کہا ہے کہ شعیب نے جو کچھ بھی حاصل کیا اس پر ان کے بیٹے اذہان اور انہیں فخر ہے۔ انہوں نے لکھا’’ ہر کہانی کا ایک اختتام ہوتا ہے، لیکن زندگی میں ہر اختتام ایک نیا آغاز ہے۔ آپ نے 20 سال تک فخر کے ساتھ اپنے ملک کے لئے کھیلا۔ آپ نے جو کچھ بھی حاصل کیا، مجھے اور اذہان کو اس پر فخر ہے‘‘۔
بتا دیں کہ 1999 میں صرف 17 سال کی عمر میں شعیب ملک نے ویسٹ انڈیز کے خلاف اپنے ون ڈے کریئر کا آغاز کیا تھا۔ انہوں نے اپنے ون ڈے کیریئر میں 287 میچ کھیلے اور 7534 رنز بنائے جس میں ان کی 9 سنچریاں، 44 نصف سنچریاں اور 158 وکٹیں شامل ہیں۔ اس کے علاوہ اب تک شعیب نے ٹی-20 میں 111 میچ کھیلے اور 2263 رنز بنائے جس میں 7نصف سنچریاں اور 28 وکٹیں شامل ہیں. اگر ٹیسٹ میچوں کی بات کریں تو انہوں نے اب تک 35 میچوں میں 1898 رنز ایک ڈبل سنچری، 3سنچری اور 8 نصف سنچریاں اور 32 وکٹیں شامل ہیں۔