کاروار: ضلع کے اسپتالوں میں آکسیجن پلانٹ تعمیر کیے جائیں گے ۔ ضلع انچارج وزیر شیورام ہیبار کی یقین دہانی
کاروار 7/ مئی (ایس او نیوز)ضلع انچارج وزیر شیورام ہیبار نے بتایا کہ کووڈ کی دوسری لہر کی وجہ سے مریضوں کو درکار آکسیجن میں کسی قسم کی قلت سے بچنے کے لئے ضلع کے سرسی، کمٹہ، یلاپور وغیرہ میں سرکاری اسپتالوں کے احاطے میں آکسیجن پلانٹ قائم کرنے کا منصوبہ بنایا گیا ہے۔
کاروار میں ڈپٹی کمشنر دفتر کے میٹنگ ہال میں پریس کانفرنس سے خطاب کرتے ہوئے انہوں نے کووڈ سے متاثرہ افراد کے لئے دستیاب علاج کی سہولتوں کے بارے میں بتایا کہ اس وقت ضلع میں 561 آکسیجن بیڈس ہیں جن میں سے 272 بستر استعمال ہورہے ہیں اور ابھی 289 بستر خالی ہیں۔ ضلع میں کُل 61 وینٹی لیٹرس موجود ہیں جن میں سے ابھی 14 وینٹی لیٹرس استعمال ہورہے ہیں اور 47 دوسرے مریضوں کے لئے دستیاب ہیں۔ اس کے علاوہ 11 میٹرک ٹن آکسیجن ذخیرہ کرنے کا منصوبہ بنایا گیا ہے۔ اس لئے آکسیجن بیڈس، دوائیاں اور وینٹی لیٹرس کی قلت کے بارے میں سوچ کر عوام کو خوفزدہ ہونے کی ضرورت نہیں ہے۔ محکمہ صحت کا عملہ، آشا اور آنگن واڈی کارکنان پوری طرح متاثرین کی خدمات میں مصروف ہیں۔ ضلع انتظامیہ اور محکمہ صحت کی ٹیمیں اپنے اپنے طور پر اس وباء پر قابو پانے کے لئے سرگرم ہیں۔
انہوں نے بتایا کہ حاملہ عورتوں کو زچگی سے دو مہینے قبل لازمی طور پر آر ٹی پی سی آر کووڈ ٹیسٹ کروانا ہوگا۔ اس سلسلے میں ڈاکٹروں کو ہدایات جاری کی گئی ہیں۔
کاروار میڈیکل کالج میں آکسیجن پلانٹ : رکن اسمبلی روپالی نائک نے بتایا کہ کاروار میڈیکل کالج ہاسپٹل میں 6کلو لکوِڈ آکسیجن پلانٹ، 390 لیٹر پر منٹ میڈیکل آکسیجن جنریٹر پلانٹ اور کووِڈ آئی سی یو وارڈ کی تعمیر کو منظوری دی گئی ہے۔ آئندہ تین ہفتوں کے اندریہ آکسیجن پلانٹ کام کرنا شروع کردے گا۔ ایم ایل اے روپالی نائک نے بتایا کہ کاروار ہاسپٹل میں ابھی تک آکسیجن کی کوئی کمی نہیں تھی ، اب آنے والے دنوں میں بھی کوئی قلت نہیں ہوگی۔