بھٹکل ،27 / مارچ (ایس او نیوز) اتر کنڑا پارلیمانی حلقے کی امیدوار ڈاکٹر انجلی نمبالکر کی بھٹکل آمد کے موقع پر وزیر برائے ماہی گیری، اندرونی بحری نقل وحمل وبندرگاہ منکال وئیدیا نے پیشین گوئی کہ اس بار پارلیمانی الیکشن کے بعد مرکز میں کانگریس پارٹی کی حکومت بنے گی اور اس حلقے کی امیدوار انجلی نمبالکر کو وزارتی قلمدان ملے گا ۔
بھٹکل کے حافظکا ہال میں منعقدہ پارلیمانی حلقے کی انتخابی تیاریوں سے متعلقہ جائزہ کے لئے منعقدہ کانگریس پارٹی کے اجلاس کا افتتاح کرتے ہوئے منکال وئیدیا نے کہا کہ ہم کبھی جھوٹ نہیں بولتے ۔ جو کہتے ہیں وہ کرکے دکھاتے ہیں ۔ ریاست میں پانچ گارنٹیوں کا وعدہ کرکے ہم برسر اقتدار آئے ۔ اب ان گارنٹیوں کو جاری کرکے دکھا دیا ۔ ہم ہماری خدمات اور کام کو سامنے رکھ کر ووٹ مانگتے ہیں ۔ لیکن بی جے پی کا معاملہ ایسا نہیں ہے ۔ وہ جھوٹ کی بنیاد پر سیاست کرتے ہیں ۔ جو نہیں کرنا چاہیے وہ کرتے ہوئے ضلع اتر کنڑا کی جو حالت کرکے رکھ دی ہے وہ سب جانتے ہیں ۔ ہمارے بہت سارے مسائل ہیں اور ان کا حل اسی وقت ممکن ہے جب مرکز میں ہماری حکومت ہو ۔
انہوں نے ڈاکٹر انجلی نمبالکر کے بارے میں بتایا کہ وہ خانہ پور حلقے سے جیتی ہوئی پہلی امیدوار ہیں ۔ وہاں انہوں نے خواتین کے لئے 60 بستروں والا اسپیشالٹی ہاسپٹل قائم کیا ہے ۔ آپ لوگوں نے مجھے ایک لاکھ ووٹوں دئے تھے ، اسی طرح اس مرتبہ پارلیمانی الیکشن میں سب سے زیادہ ووٹ دے کر ڈاکٹر انجلی کو جیت دلائیں ۔
منکال نے کہا کہ اسمبلی الیکشن میں گارنٹی کارڈ دیکھ کر آپ نے ایک لاکھ ووٹ دئے اب پارلیمانی الیکشن آنے تک گارنٹی کی رقم عوام کے گھروں تک پہنچا دی گئی ہے ۔ یہ ہماری خدمات ہیں ۔ مجھے اپنے حلقے کے عوام پر پورا بھروسہ ہے ۔
اس موقع پر نامدھاری سماج کے بزرگ لیڈر ایل ایس نائک، بلاک کانگریس صدر وینکٹیش نائک، ضلع کانگریس نائب صدر راما موگیر، مہیلا بلاک کانگریس صدر نئینا نائک، ضلع پنچایت سابق صدر جئے شری موگیر، ضلع پنچایت سابق رکن البرٹ ڈی کوستا، عبدالروف نائطے ، وینکٹیا بیرومنے، ایچ آر نائک وغیرہ بھی موجود تھے ۔