بھٹکل یکم ستمبر (ایس او نیوز/شہناز جوکاکو) انجمن الفطرہ اسلامک پری اسکول بھٹکل کی طرف سے  گذشتہ روز پرائمری جماعت  کے طلبہ کے لئے وضو کے عملی مشق کا آن لائن مسابقہ منعقد کیا گیا جس میں ننھے منے بچوں نے حصہ لیتے ہوئے  اپنے اپنے گھروں میں  وضو کا طریقہ آن لائن وڈیو گرافی کے ذریعے پیش کیا۔

انجمن  کے جنرل سکریٹری صدیق اسماعیل نے بتایا کہ  انجمن الفطرہ اسلامک اسکول میں   ابتداء سے ہی  خصوصی طور پر وضو اور نماز کی مکمل ٹریننگ دی جاتی ہے اور وقتاً فوقتاً   ان بچوں کے درمیان  مختلف دینی و  معلوماتی  مقابلے اور پروگرامس منعقد  ہوتے رہتے  ہیں تاکہ بچوں میں بھی دینی احکامات پر عمل کرنے میں  دلچسپی  بنی رہے۔ انہوں نے بتایا کہ آن لائن وضو مسابقہ کے لئے  بچوں کے والدین اور سرپرستان نے مکمل تعاون کیا اور بچوں کے وضو کرنے کے طریقے اپنے موبائل کے ذریعے  وڈیو گرافی کرائی  اور وہاٹس ایپ کے ذریعے روانہ  کرتے   ہوئے اس مسابقہ میں بچوں کو شامل کرایا۔  انہوں نے پروگرام منعقد کرنے والے اسکول کے ٹیچروں سمیت بچوں کے والدین کا بھی شکریہ ادا کیا اور اس بات کی توقع ظاہر کی کہ آئندہ بھی  والدین اس طرح کے پروگراموں میں اپنے بچوں کو شامل کرائیں گے اور اپنے نونہالوں کو دینی و عصری علوم سے آراستہ کرنے میں انجمن انتظامیہ کے  ساتھ مکمل  تعاون کرینگے۔