بھٹکل 22/مئی (ایس او نیوز)  کرناٹکا کی سرحد  کھولتے ہی جس طرح  ریاست میں کورونا مریضوں کی تعداد بڑھتی جارہی ہے، وہیں ضلع اُترکنڑا میں بھی کورونا کے معاملات رُکنے کا نام نہیں لے رہے ہیں، ایک وقت میں صرف بھٹکل کو کورونا ہاٹ اسپاٹ کہا جارہا تھا اور بھٹکل کے عوام کو نہ صرف شک کی نگاہ سے دیکھا جارہا تھا بلکہ سوشیل میڈیا اور دیگر ذرائع کے ذریعے بھٹکل کےبالخصوص مسلم  عوام کے خلاف دیگر   لوگوں میں خوف پیدا کیا جارہا تھا، مگر جب سے لاک ڈاون میں ڈھیل دی گئی ہے، مہاراشٹرا اور دیگر علاقوں سے  جو لوگ ضلع میں داخل ہورہےہیں، اُس کے نتیجے میں  کورونا سے متاثرہ مریضوں کے معاملات اب  ضلع کے تقریباً  تعلقہ جات  سے سامنے آرہے ہیں۔

تازہ معاملہ پھر ایک بار ہوناور سے سامنے آیا ہے جہاں ممبئی سے آئے ہوئے ایک 44 سالہ شخص کی رپورٹ کورونا پوزیٹو آئی ہے۔ ذرائع سے پتہ چلا ہے کہ اس شخص کا تعلق منکی سے ہے، مگر اُسے ممبئی سے ہوناور ہوٹل میں کورنٹائن کیا گیا تھا اور اس کے   تھوک کے سیمپل جانچ کے لئے روانہ کئے گئے تھے،  بتایا گیا ہے کہ یہ شخص اپنی اہلیہ اور ایک ڈھائی سالہ لڑکے کے ساتھ ممبئی سے آیا تھا۔ فی الحال اس کی اہلیہ اور لڑکے کی رپورٹ کے تعلق سے کسی طرح کی جانکاری نہیں دی گئی ہے، البتہ 44 سالہ بزنس مین کی رپورٹ کورونا پوزیٹو آنے کی تصدیق کی گئی ہے۔

آج کے تازہ معاملے کے ساتھ ہی ہوناور تعلقہ میں کورونا متاثرین  کی تعداد بڑھ کر 6 ہوگئی ہے۔ جبکہ ضلع اُترکنڑا میں یہ تعداد بڑھ کر 62 ہوگئی ہے، خیال رہے کہ ان میں سے 11 لوگ صحت یاب ہوکر اسپتال سے ڈسچارج ہوچکے ہیں۔اس طرح  ایکٹیو کیسس اب 51 ہے۔

بتاتے چلیں  کہ کل جمعرات کو سرسی میں نو کورونا پوزیٹو معاملات سامنے آئے تھے جس کے تعلق سے خبر دی گئی ہے کہ نو میں سے دو کا تعلق اُڈپی سے ہے، لیکن اُڈپی کے اُن دونوں  مریضوں  کو کاروار کمس میں شفٹ کیا گیا ہے، مگر چونکہ پتہ چلا ہے کہ  اُن کا تعلق اُڈپی سے  ہے، اس بناء پراُن دونوں کے نام اُڈپی کی کورونا سے متاثرہ لسٹ میں شامل کیا گیا ہے اور ضلع اُترکنڑا کی لسٹ سے ان دونوں کے نام حذف کرلئے گئے ہیں۔اس حساب سے ضلع اُترکنڑا میں کورونا سے متاثرہ مریضوں کی تعداد اب 62 ہے۔