اب ڈرائیونگ لائسنس کو آدھار کارڈ سے مربوط کرنا لازمی
نئی دہلی ، 24؍ستمبر (ایس او نیوز؍ایجنسی) ملک میں ڈرائیونگ لائسنس کے حوالے سے جعلسازی میں بہت تیزی سے اضافہ ہوا ہے۔ اس پر روک لگانے کے لیے اب آدھار کارڈ کو ڈرائیونگ لائسنس سے مربوط لازمی کر دیا گیا ہے۔اس طرح ڈرائیونگ لائسنس کے حوالے سے ملک میں دھوکہ دہی اور کرپشن کا بھی خاتمہ ہو جائے گا۔آدھار کارڈ کسی بھی ہندوستانی شہری کے لئے ایک بہت ہی اہم دستاویز ہے۔اس کی مدد سے ہم بہت سی سرکاری اسکیموں کا باآسانی فائدہ اٹھا سکتے ہیں۔اب ڈرائیونگ لائسنس کی تصدیق کے لئے بھی اسے آدھار کارڈ سے جوڑنا لازمی قرار دیا گیا ہے۔ملک میں کورونا وبا پھیلنے کے پیش نظر ڈرائیونگ لائسنس سے متعلق تمام کام کئی روز تک روک دیے گئے تھے۔فی الحال ملک میں کورونا کے معاملوں میں کمی کے پیش نظر کئی ریاستوں میں ڈرائیونگ لائسنس سے متعلق کام دوبارہ شروع کر دیا گیا ہے۔اگر آپ اپنے آدھار کارڈ کو ڈرائیونگ لائسنس سے مربوط کرنا چاہتے ہیں تو آپ کو اس کے لئے پریشان ہونے کی ضرورت نہیں ہے۔اب آپ گھر بیٹھے اپنے آدھار کارڈ کو اپنے ڈرائیونگ لائسنس سے مربوط کرسکتے ہیں۔ آئیے جانتے ہیں کہ اپنے آدھار کارڈ کو ڈرائیونگ لائسنس سے کیسے مربوط کریں۔ڈرائیونگ لائسنس کو آدھار کارڈ سے جوڑنے کے لئے آپ کو سب سے پہلے اپنی ریاست کے ٹرانسپورٹ ڈپارٹمنٹ کی ویب سائٹ پر جانا ہوگا۔اس کے بعد آپ کو لنک آدھارکے آپشن پر کلک کرنا ہوگا۔اس کے بعد آپ کو ڈراپ ڈاؤن پر جانا ہوگا اور ڈرائیونگ لائسنس کے آپشن پر کلک کرنا ہوگا۔اس کے بعد آپ کو یہاں اپنا ڈرائیونگ لائسنس نمبر درج کرنا ہوگا۔اس کے بعد آپGet Details بٹن پر کلک کرنا ہوگا۔اس کے بعد آپ کو اپنا آدھار نمبر اور موبائل نمبر درج کرنا ہوگا۔اس کے بعد آپ کو Submit کے آپشن پر کلک کرنا ہوگا۔اس کے بعد ایس ایم ایس کے ذریعے آپ کے موبائل نمبر پر ایک OTP آئے گا۔اس OTP کو داخل کرنے کے بعد ، آپ کے آدھار کو اپنے ڈرائیونگ لائسنس سے مربوط کا عمل مکمل ہوجائے گا۔