منگلورو میں بدنام زمانہ غنڈے نے پولیس پر چڑھائی کار - موقع سے ہوگیا فرار
منگلورو 8/ جنوری (ایس او نیوز) تاخیر سے سامنے آئی ایک رپورٹ کے مطابق بدنام زمانہ غنڈہ 'آکاش بھون' شرن نے جان لیوا حملے کے ارادے سے سٹی کرائم برانچ پولیس کے افسران پر اپنی کار چڑھائی اور موقع پر فرار ہونے میں کامیاب ہوگیا ۔
بتایا جاتا ہے کہ یہ واقعہ 2 جنوری کی رات کو میری ہِل علاقے میں پیش آیا تھا جب سی سی بی پولیس نے مطلوبہ ملزم آکاش بھون شرن کو گرفت میں لینے کے مقصد سے اس کی کار روکنے کی کوشش کی ۔ اس وقت بڑے ہی جارحانہ انداز میں آکاش نے اپنی کار پولیس کی گاڑی سے ٹکرائی اور سرعت کے ساتھ وہاں سے فرار ہوگیا ۔ اس تعلق سے سی سی بی پولیس کی طرف سے کاوور پولیس اسٹیشن میں کیس درج کیا گیا ہے ۔
معلوم ہوا ہے کہ گزشتہ سال اکتوبر میں عدالت نے رام کرشنا مرڈر کیس میں پانچ ملزمین کو عمر قید کی سزا سنائی تھی جس میں آکاش بھون شرن بھی شامل ہے جس نے قتل کا ٹھیکہ لیا تھا ۔ عدالت کے فیصلے کے بعد شرن لاپتہ ہوگیا تھا اور پولیس اس کی تلاش میں سرگرداں تھی ۔ 2 جنوری کی رات کو مصدقہ اطلاع کی بنیاد پر سی سی بی پولیس نے اس کار کو روکنے کی کوشش کی جس میں آکاش بھون شرن موجود تھا ۔ اس وقت موقع سے فرار ہونے کے لئے ملزم نے پولیس افسران کو موت کے گھاٹ اتارنے کی کوشش کی اور اپنی کار کو پولیس گاڑی کے ساتھ ٹکرا دیا ۔
شرن کے بارے میں پتہ چلا ہے کہ اس پر منگلورو اور اڈپی میں 21 مجرمانہ معاملے درج ہیں ۔ جس میں قتل، اقدام قتل، نابالغ لڑکی کی عصمت دری، غیرقانونی ہتھیار رکھنے اور ہفتہ وصولی وغیرہ کے معاملے شامل ہیں ۔ اگست 2020 میں جب شرن جیل میں قید تھا تو اس نے اپنے گرگوں کی مدد سے سریندرا بنٹوال کا قتل کروایا تھا ۔ 2022 میں وہ ضمانت پر رہا ہوا تھا ۔ پھر جنوری 2023 میں سورتکل میں ایک اسکوٹر سوار کو لوٹنے کی کوشش کے الزام میں وہ دوبارہ گرفتار ہوا ۔ جب چار مہینے کی قید کے بعد وہ جیل سے رہا ہوا تو روپوش ہوگیا اور تب سے وہ کوشش کے باوجود پولیس کے ہاتھ نہیں لگ رہا ہے ۔