کاروار:29؍مارچ (ایس او نیوز) شمالی کینرا لوک سبھا حلقہ کے لئے کانگریس ۔ جے ڈی ایس کے مشترکہ امیدوار کے طورپر منتخب ہونے والے آنند اسنوٹیکر 30مارچ کو اپنے خاندان والوں کے ساتھ بحیثیت امیدوار اپنا پرچہ نامزدگی داخل کریں گے۔

ماناجارہا تھا کہ 30 مارچ کو اسنوٹیکر کانگریس اور جے ڈی ایس کے ہزاروں کارکنوں کے ساتھ اپنا پرچہ نامزدگی داخل کریں گے۔ لیکن ابھی تک سنیئر لیڈر آر وی دیش پانڈے سے رابطہ نہیں ہونے اور ان سے بات چیت نہیں ہونے کی وجہ سے اور کانگریس کے سبھی لیڈران سے ملاقات نہیں ہونے سے 30مارچ کو علامتی طورپر اپنے خاندان کےساتھ اسنوٹیکر پرچہ نامزدگی داخل کرنے کا طئے کئے جانےکی اطلاعات موصول ہوئی ہیں۔ اس کے بعد پرچہ نامزدگی کے آخری دن یعنی 4اپریل کو وزیر اعلیٰ کمار سوامی ، وزیر آر وی دیش پانڈے ، نویدیت آلوا سمیت کانگریس ، جے ڈی ایس کے سبھی لیڈران ، ضلعی صدور ، عہدیداران ، کارکنان کو جمع کرتے ہوئے ہزاروں حمایتیوں کے ساتھ پرچہ نامزدگی داخل کرنے کی بات کہی جارہی ہے۔

دوستی پارٹی کے امیدوار آنند اسنوٹیکر انتخاب لڑنے کی پوری تیار ی میں ہیں البتہ ان کی بھرپور حمایت کرنےو الی کانگریس پارٹی کے کارکنان میں ابھی تک سرگرمی نہیں دیکھی گئی ہے۔ پارٹی لیڈران اعلیٰ کمان کہیں تو انتخابی تشہیر میں شریک ہونےکی بات کہہ رہے ہیں مگر سچائی یہ ہے کہ اترکنڑا ضلع کے لئے دیش پانڈے ہی ہائی کمان ۔ دوسرے کوئی کچھ بھی کہیں اس پر عمل آوری ایک حدتک ہی ہوگی ، اگر دیش  پانڈے انہیں متحرک کریں تو ہی کارکنان سرگرمی کے ساتھ انتخابی تشہیر میں شریک ہونگے۔ وہیں اعلیٰ کمان کی طرف سے آرڈر آبھی جاتاہے مگر دیش پانڈے کافرمان نہیں تو پھر لیڈران اور کارکنان  برائے نام شرکت کریں گے تو کوئی تعجب کی بات نہیں ہے۔