نئی دہلی:20؍دسمبر(ایس اؤ نیوز )  ملک میں کھیلےگئے عالمی کپ میں بہترین مظاہرہ کرنے والے ہندوستانی کرکٹ ٹیم کےمایہ ناز تیز گیند باز محمد شامی کو قومی کھیل ایوارڈ’ارجن ایوارڈ‘ دینے کا اعلان کیاگیا ہے۔ محمد شامی سمیت 26دیگر کھلاڑیوں کے نام بھی فہرست میں شامل ہیں۔ اس کے علاوہ ساتوک اور چراغ کو کھیل رتن ایوارڈ سےنوازے جانے کا اعلان کیاگیا ہے۔

میڈیا رپورٹس کے مطابق مرکزی وزارت برائے کھیل نے بدھ (20 دسمبر) کو قومی کھیل ایوارڈس کا اعلان کیا جس میں ارجن ایوارڈ کے لیے محمد شامی (یا محمد سمیع) سمیت 26 دیگر کھلاڑیوں کے نام بھی شامل ہیں۔ ان سبھی کھلاڑیوں کو صدر جمہوریہ دروپدی مرمو کے ذریعہ راشٹرپتی بھون میں 9 جنوری 2024 کو منعقد ہونے والی عظیم الشان تقریب کے دوران ایوارڈ سے نوازا جائے گا۔

قابل ذکر ہے کہ عالمی کپ 2023 میں بہترین کارکردگی کا مظاہرہ کرنے والے محمد شامی کا نام ہندوستانی کرکٹ کنٹرول بورڈ (بی سی سی آئی) نے نام پیش کیے جانے کی آخری تاریخ ختم ہونے کے بعد بھیجا تھا۔ بی سی سی آئی نے خصوصی سفارش کے ساتھ محمد شامی کا نام وزارت کھیل کے پاس بھیجا تھا، جسے وزارت نے منظور بھی کر لیا تھا، اور اب محمد شامی کو ارجن ایوارڈ دینے کا باقاعدہ اعلان بھی ہو گیا ہے۔

دوسری طرف ملک کی نمبر ایک مینس ڈبلز بیڈمنٹن جوڑی ساتوک اور چراغ کو میجر دھیان چند کھیل رتن ایوارڈ دیے جانے کا فیصلہ کیا گیا ہے۔ کھیل رتن ہندوستان کا سب سے بڑا کھیل ایوارڈ ہے۔ ساتوک سائراج رینکی ریڈی اور چراغ شیٹی کی جوڑی نے مل کر اپنی کارکردگی سے ملک کا نام روشن کیا ہے جس کو دیکھتے ہوئے انھیں یہ اعزاز دینے کا فیصلہ کیا گیا۔