منڈگوڈ15/اگست (ایس او نیوز) گدگ ودھان سبھا حلقے کے رکن اسمبلی ایچ کے پاٹل نے منڈگوڈ تعلقہ کے چیگلّی کا دورہ کرتے ہوئے وہاں پر سیلاب سے متاثرہ ڈیم اور آس پاس کے کھیتوں کا معائنہ کیا۔
خیال رہے کہ بھاری برسات کے بعد چیگلّی ڈیم ٹوٹ جانے سے وہاں کے کسانوں کا زبردست نقصان ہوا ہے۔یہاں کے کسانوں نے قرضہ جات لے کر جو فصلیں اگائی تھیں، وہ سب سیلاب کی نذر ہوگئی ہیں۔متاثرہ کسانوں نے رکن اسمبلی ایچ کے پاٹل کے روبرو اپنا دکھڑا سناتے ہوئے کہا کہ اب آگے زندگی بسران کے لئے انتہائی دشوار ہوگیا ہے۔ا س کے علاوہ قرضہ جا ت واپس ادا کرنے کے لئے بھی ان کے پاس دوسرا کوئی ذریعہ نہیں ہے۔اس لئے رکن اسمبلی ان پر رحم کریں اور ان کے بوجھ کو ہلکا کرنے کا راستہ دکھائیں۔
ایچ کے پاٹل نے تباہ حال کسانوں کی ہمت بندھاتے ہوئے کہا کہ حالات بہتر ہوجائیں گے اس لئے وہ مایوس نہ ہوں۔وہ ان کی مشکلات کو حکومت کے علم میں لائیں گے اور جتنی جلدی ممکن ہوگا انہیں امداد اور معاوضہ فراہم کرنے کی کوشش کریں گے۔
اس موقع پر ضلع شمالی کینرا کے کانگریس صدر بھیمنّا نائک، سابق رکن اسمبلی رودرپّالمانی، سابق رکن پارلیمان آئی جی سندی، منڈگوڈ کانگریس کے لیڈر کرشنا ہیرلّی کے علاوہ بہت سارے کانگریسی لیڈران اور کارکنان موجود تھے۔