بھٹکل 29/جون (ایس او نیوز) ریاست کرناٹک کے دیگر اضلاع کی طرح اب اُترکنڑا میں بھی کورونا کے معاملات میں روزبروز اضافہ دیکھا جارہا ہے ، کل ایک ہی دن 14 معاملات سامنے آنے کےبعد کہا جارہا تھا کہ پہلی بار اتنی بڑی تعداد میں  ایک ہی دن میں معاملات سامنے آئے ہیں مگر آج اُس سے بھی زیادہ معاملات سامنے آنے کا خدشہ ہے۔

فی الوقت جو اطلاع موصول ہوئی ہے ، اس کے مطابق یلاپور میں  کورونا کے سات معاملات، ہوناور میں پانچ، منڈگوڈ میں دو، کاروار  میں دو، گوکرن میں ایک، بھٹکل میں ایک اور سرسی میں ایک  کی رپورٹ کورونا پوزیٹیو ہونے کی  خبر ہے۔  اس کے علاوہ مزید کتنے لوگوں کی رپورٹ پوزیٹیو آئی ہے، اُس کی جانکاری شام پانچ بجے آنے والی محکمہ صحت کی ہیلتھ بلٹین کے بعد ہی  ہوسکتی ہے۔

بھٹکل میں جس شخص کی رپورٹ آج کورونا پوزیٹیو آئی ہے، وہ قریب آٹھ روز قبل وجئے واڑا (آندھرا پردیش) سے آیا تھا اور آتے ہی اسے سرکاری اسکول میں کورنٹائن کیا گیا تھا۔ یاد رہے کہ   مخدوم کالونی کا یہ شخص  جس شخص کے ساتھ بھٹکل آیا تھا اُس کی رپورٹ دو روز قبل ہی پوزیٹیو آچکی ہے۔

کمس سےبارہ لوگ ڈسچارج:   کمس میں ایک طرف کوویڈ۔19 کے مریضوں کی تعداد میں اضافہ ہورہا ہے تو وہیں دوسری طرف  تقریبا ہر دو دن میں  لوگ صحت یاب ہوکر ڈسچارج بھی ہورہے ہیں۔

ذرائع سے ملی اطلاع کے مطابق کل اتوار کو کاروار انسٹی  ٹیوٹ آف میڈیکل سائنس (کمس) سے 12 لوگ صحت یاب ہوکر ڈسچارج ہوئے ہیں جن میں ہلیال کے 32 سالہ اور 34 سالہ شخص، بھٹکل کی 42 سالہ خاتون اور 45 سالہ شخص، سرسی سے 43 سالہ  عورت، ہوناور سے 60 سالہ عورت، کاروار سے 42 سالہ شخص، ہوناور سے 67 سالہ عورت اور 78 سالہ شخص، کمٹہ سے 24 سالہ اور 28 سالہ  لڑکی اور  42 سالہ شخص شامل ہیں۔