بھٹکل 28/ستمبر(ایس او نیوز) خاتم النبیین، رحمت اللعالمین حضرت محمدﷺ کی یوم ولادت کے موقع پرمرکزی ید میلاد کمیٹی کی جانب سے آج جمعرات 12 ربیع الاول کوحسب سابق میلادالنبی ﷺ کا جلوس مذہبی جوش وخروش اورانتہائی عقیدت واحترام کے ساتھ نکالا گیا جس میں بزم فیض الرسول، ادارہ فیض الرسول، المدینہ، ایس ایس ایف اور تاج السنہ سمیت کئی دیگر اداروں کےبینرتلے عوام جلوس میں شریک رہے۔
مرکزی عید میلاد کمیٹی کے صدرسید مُنیراحمد کی قیادت میں بعد نمازعصرعیدگاہ میدان میں لوگ جمع ہونا شروع ہوئے اورمدرسہ تاج السنّہ کے پرنسپل مولانا سید علوی البخاری مدنی تنگل کی دُعا کے ساتھ 4:30 بجے جلوس کا آغاز ہوا۔ بارش کی پرواہ نہ کرتے ہوئے نعت، درود و سلام، دف اور تکبیر کے نعروں کے ساتھ جلوس شمس الدین سرکل سے نیشنل ہائی وے ہوتا ہوا اولڈ بس اسٹینڈ، سلطان اسٹریٹ، چوک بازار، محمد علی روڈ اور مین روڈ سے گذرتا ہوا پبلک چبوترا پر پہنچا۔ یہاں سید مُنیراحمد نے جلوس میں شامل تمام لوگوں کا شکریہ ادا کیا۔ اس موقع پر مولانا محمد جُفری اکرمی، مولانا حبیب اللہ ثقافی، مولانا فیضان محتشم، اسماعیل چڑوباپا حبیب اللہ، مولانا رئیس اکرمی، عبدالعلیم گوائی، ابوہریرہ اکرمی، ارشاد عرف علی شاہ قاضیا، ناگرمٹ جُفری، عبدالرحمن عرف مستان چڑوباپا، خواجہ سُکیری وغیرہ جلوس میں پیش پیش تھے۔
حفاظتی انتظامات کے تحت ضلع کے ایس پی وشنووردھن خود بھٹکل میں موجود تھے جبکہ ڈی وائی ایس پی شریکانت کی قیادت میں سرکل پولس انسپکٹر گوپال چندن سمیت پولس کا عملہ اہم ناکوں پرپہرہ دے رہا تھا۔
میلادالنبی کے موقع پراسپتال کے مریضوں میں پھلوں کی تقسیم: میلادالنبیﷺ کی مناسبت سے 12 ربیع الاول کو جلوس سے قبل بزم فیض الرسول کے ایک وفد نے بھٹکل سرکاری اسپتال پہنچ کرمریضوں میں بسکٹ، فروٹس اور کولڈ ڈرنکس تقسیم کئے۔ اس موقع پر سرکاری اسپتال کی انچارج ڈاکٹر سویتا کامتھ، ڈاکٹر نادیہ سمیت بزم فیض الرسول کے ذمہ داران بالخصوص سید مُنیر، عبدالعلیم گوائی، ڈاکٹریحیٰ عسکری وغیرہ موجود تھے۔