بھٹکل میں کل پیر کونورحلقہ کی طرف سے ہورہا ہے ووٹرآئی ڈی کا میگا کیمپ؛ پرانے کارڈ رکھنے والوں سے بھی جانچ کرنے کی اپیل
بھٹکل 3/مارچ (ایس او نیوز) بھٹکل بندرروڈ پر کل پیر کو ووٹر آئی ڈی کا میگا کیمپ منعقد کیا گیا ہے، جہاں 18 سال مکمل کرنے والوں کے لئے نیا شناختی ووٹر کارڈ بنوانے تفصیلات جمع کرائی جاسکے گی۔ کیمپ میں شناختی کارڈ میں نام وغیرہ کو درست کیا جاسکے گا، اڈرس اگر تبدیل کرنا ہے تو تبدیل کئے جاسکیں گے، ساتھ ساتھ پرانے کارڈ رکھنے والوں کے لئے نیا اسمارٹ کارڈ فراہم کرنے کی بھی سہولت دی جارہی ہے۔
اس کیمپ میں بھٹکل تحصیلدار کی طرف سے قریب دس سے بارہ بی ایل او (بلاک لیول آفسرس) اپنی خدمات پیش کریں گے، ساتھ ساتھ مقاامی اسپورٹس سینٹرس کے اراکین بھی اپنی خدمات پیش کریں گے۔
بھٹکل نورحلقہ کی طرف سے اس کیمپ کا انعقاد کیا گیا ہے جہاں ایک ساتھ دس سے بارہ سرکاری آفسران شریک رہیں گے اور شناختی کارڈ کے تعلق سے عوام الناس کو ہر ممکن تعاون فراہم کریں گے۔
کیمپ میں شریک ہونے والوں سے کہا گیا ہے کہ وہ اپنے ساتھ آدھار کارڈ، اڈرس پروف، پیدائشی تاریخ کا پروف ، موبائل فون (جس پر OTP آئے گا) اور پاسپورٹ سائز کلر فوٹو لیتے آئیں۔
کیمپ بھٹکل بندرروڈ فورتھ کراس پر واقع الافراح شادی ہال میں رکھا گیا ہے، صبح نو بجے سے شام 4:30 بجے تک یہ کیمپ چلے گا۔ بھٹکل کے عوام کے لئے یہ ایک سنہرا موقع ہے کہ لوک سبھا انتخابات کا اعلان ہونے سے پہلے اپنے اپنے ووٹر شناختی کارڈ کو بنوانے کی طرف توجہ دیں اور جن کے پاس پہلے سے کارڈ موجود ہیں، وہ بھی اپنے نام ووٹرلسٹ میں چیک کریں کہ آیا اُن کے نام لسٹ میں ہیں یا کسی وجہ سے خارج ہوگئے ہیں۔
بتاتے چلیں کہ بھٹکل کا نورحلقہ، نوراسپورٹس سینٹر، الایمان اسپورٹس سینٹر، سوپر اسٹار اسوسی ایشن، شاہین اسپورٹس سینٹر ، الہلال اسوسی ایشن اور مون اسٹار اسپورٹس سینٹر پر مشتمل ہے۔ میگا ووٹر آئی ڈی کارڈ کیمپ میں تمام اسپورٹس سینٹروں کے رضاکار موجود رہیں گے۔ جو کیمپ میں شریک ہونے والوں کے لئے ہرممکن تعاون فراہم کریں گے۔
یاد رہے کہ اس کیمپ کو مجلس اصلاح و تنظیم اور بھٹکل مسلم یوتھ فیڈریشن کی حمایت حاصل ہے اور تماموں کے تعاون سے اس کیمپ کا انعقاد کیا گیا ہے۔