سداپورسیلاب سے متاثرین کی باز آباد کاری مولانا سید ارشد مدنی نئے مکانوں کی چابیاں تقسیم کریں گے
بنگلورو،16؍ ستمبر(ایس او نیوز؍پریس ریلیز) گزشتہ کئی سالوں سے ملک کی کئی ریاستیں ہر سال سیلاب کی مار جھیل رہی ہیں اور وبائی بیماری نے معیشت کا حال خستہ کر دیا ہے۔ ان ناسازگار حالات میں بھی جمعیۃ علماء عوام کی خدمت بلا لحاظ فرقہ و مذہب صرف انسانیت کی بنیاد پرکرتی آرہی ہے جو جمعیۃ علماء کی امتیازی خصوصیت ہے۔سال 2018-19 میں ریاست کرناٹک کے شمالی ضلعوں اورکیرلا میں بھاری بارش اور سیلاب کی وجہ سے سینکڑوں گھر تباہ اور ہزاروں لوگ بے گھر ہوئے تھے۔ جمعیۃ علماء نے فوری اقدامات کرتے ہوئے متاثرین کیلئے راحت رسانی کی اورممکنہ حد تک ضروری اشیاء پہنچائے تھے۔ ان علاقوں کا مکمل سروے کرنے کے بعد جو لوگ بے گھر ہوئے تھے اُن کیلئے کیرلا کے ویناڈ میں 100 نئے مکان تعمیر کرائے اور 100 مکانوں کی مرمت کروا کراپریل 2019 میں متاثرین کے حوالے کئے گئے۔ اس سال مہاراشٹر کے کوکن علاقہ میں سیلاب سے متاثرین کو فوری راحت رسانی پہنچائی گئی اور 36 مکانوں کی تعمیر کا کام شروع کیا گیا، اسی طرح کرناٹک میں سداپور ضلع کوڈاگو میں بھی جمعیۃ علماء اورسداپور مسلم اسوسی ایشن کے تعاون سے محفوظ جگہ زمین خرید کر نئے پکے مکانوں کا تعمیری کام جمعیۃ علماء کرناٹک کی زیر نگرانی شروع کیا گیا، جس میں لاک ڈاؤن کی پابندیوں کی وجہ سے کچھ تاخیرہوئی۔ اب 14 مکانوں کی تعمیر مکمل ہو چکی ہے۔ ان مکانوں کی چابیاں بروز جمعہ 17 ستمبر صبح 10بجے ایک خصوصی پروگرام میں بمقام جمعیۃ کالونی سداپور، مولانا سید ارشد مدنی صدر جمعیۃ علماء ہند کے ہاتھوں تقسیم کی جائیں گی۔ اس جگہ مزید 16 عدد مکانوں کی تعمیر کا بھی عنقریب کام شروع کیا جائیگا جو بلا لحاظ مذ ہب متاثرین میں تقسیم کئے جائیں گے۔یہ جمعیۃ علماء کی عظیم خدمات کی چند مثالیں ہیں جو حالیہ دور میں مولانا ارشد مدنی کے ذریعے انجام پائی ہیں۔اللہ تعالیٰ کے فضل اور اہل خیر حضرات کے تعاون سے یہ سب ممکن ہوسکا، ہم ان تمام حضرات کے شکر گزار ہیں جنہوں نے ان خدمات میں دامے درمے سخنے ہمارا تعاون کیا۔