بھٹکل میں پوکسو کے تحت شادی شدہ شخص گرفتار؛ اُڈپی سے بھٹکل آنے کے دوران بس پر کررہا تھا ایک لڑکی کو پریشان
بھٹکل29 مارچ (ایس او نیوز) بھٹکل میں پوکسو (Protection of Children from Sexual Offences) ایکٹ کے تحت ہوناور کے ایک شخص کو گرفتار کرلیا گیا ہے اور عدالت میں پیش کرنے کے بعد کاروار جیل بھیج دیا گیا ہے۔
اطلاع کے مطابق جمعرات دیر رات ایک خاتون اپنی ١٤ سالہ لڑکی کے ساتھ پرائیویٹ بس پر سوار اُڈپی سے بھٹکل آرہی تھی، جس کے دوران ایک شخص نے اس کی لڑکی کے ساتھ نازیبا حرکت کرنے کی کوشش کی، جب خاتون نے روکنے کی کوشش کی تو اُس کے ساتھ بھی بدتمیزی سے پیش آنے لگا،جس پر خاتون نے بھٹکل میں موجود اپنے رشتہ داروں کو واقعے کی خبر کی اورجیسے ہی بس بھٹکل پہنچی، متعلقہ شخص کو دبوچ لیا گیا اور بھٹکل پولس کے حوالے کیا گیا۔ پتہ چلا ہے کہ خاتون اُڈپی اسپتال سے بھٹکل آرہی تھی، جس کے دوران یہ واردات پیش آئی۔
پولس نے ہوناور سے تعلق رکھنے والے ملزم سُبرامنیا اِیرا گوڈا (35) کے خلاف پوکسو ایکٹ کے تحت معاملہ درج کرلیا ہے اورعدالت میں حاضر کرکے جیل کی سلاخوں کے پیچھے بھیج دیا ہے۔ پولس نے بتایا کہ سبرامنیا ملپے میں بوٹ پر کام کرنے والا مزدور ہے اور شادی شدہ بھی ہے۔
بھٹکل ٹاون پولس تھانہ میں معاملہ درج کیا گیا ہے۔