منگلورو،24 / مئی (ایس او نیوز) مانسون کی آمد کے پیش نظر منگلورو اور اڈپی کے افسران نے  گہرے سمندر میں ماہی گیری پر آئندہ دو ماہ کے لئے پابندی لگانے کا اعلان کیا ہے  جو کہ یکم جون سے 31 جولائی تک جاری رہے گی۔
    
سرکاری افسران نے بتایا کہ اس موسم میں ماہی گیری پر پابندی لگانے کا مقصد مچھلیوں کے شکار کے طریقوں کو ضابطے میں رکھنے اور بحری وسائل (میرین ریسورسس) کا تحفظ کرنا ہے۔ اس پابندی کے تحت کسی بھی قسم کے جال آلات استعمال کرنے والی مشینی کشتیوں اور 10 ہارس پاور سے زائد طاقت والے موٹر سے چلنے والی تمام کشتیوں کو ماہی گیری کی سرگرمیوں سے باز رہنا ہوگا۔ البتہ ماہی گیروں کو اپنی کشتیاں لانے لے جانے اور 10 ہارس پاور سے کم طاقت والے موٹر سے چلنے والی کشتیوں اور دیسی کشتیوں کے ساتھ ساحلی علاقے میں مچھلیوں کا شکار کرنے کی اجازت ہوگی۔ 
    
سرکاری افسران نے تنبیہ کی ہے کہ اگر کوئی بھی کشتی اس قانون کی خلاف ورزی کرتی ہوئی پائی جائے گی تو کرناٹکا میرین اینڈ فشریز ایکٹ 1986 کے تحت اسے جرمانہ ادا کرنا ہوگا اور وہ ایک سال کے لئے سبسیڈی والا ڈیزل حاصل کرنے کی اہل نہیں رہے گی۔ 
    
محکمہ ماہی گیری کے جوائنٹ ڈائریکٹر نے تمام ماہی گیروں سے اپیل کی ہے کہ وہ اس سرکاری حکم کی پابندی کریں اور کسی قسم کی خلاف ورزی کرنے سے باز رہیں۔