منگلورو2/دسمبر (ایس او نیوز) ساحلی کرناٹکا میں ہونے والی اچانک اور غیر متوقع برسات یہاں کے کسانوں کے لئے ایک آفت بن گئی ہے۔محکمہ موسمیات نے طوفانی کیفیت کی وجہ سے مزید چند دنوں تک بارش کی پیشین گوئی کی ہے، جس کسانوں کی نیند حرام ہوگئی ہے۔

 یکم دسمبر کو دوپہر کے وقت اچانک موسم بدل گیااوربرسات ہونے لگی جس سے سپاری کی باغبانی کرنے والے پریشان ہوگئے کیونکہ انہوں نے سپاری کی فصل کاٹ کر اسے سوکھنے کے لئے آنگن اور کھلے میدان میں رکھ چھوڑا تھا۔دوسری طرف کوڈاگو میں کافی کے باغبان اس لئے پریشان ہوگئے ہیں ان دنوں میں کافی کے بیج سوکھنے کے لئے چھوڑے گئے ہیں۔منگلورو شہر میں بھی یکم دسمبر کی شام میں بہت زیادہ برسات ہوئی جس سے عوام کو پریشانی کاسامنا کرنا پڑا۔ 

 معلوم ہوا  ہے کہ پوری ریاست میں موسم بدل گیا ہے اور اکثر مقامات پر بادل چھائے ہوئے ہیں۔بنگلورو او رمضافات میں بھی اتوار کے دن اچھی خاصی برسات ہوئی ہے۔محکمہ موسمیات کے مطابق ساحلی علاقوں اورشمالی کرناٹکا میں میں تیز ہوائیں چلنے اور تھوڑی تھوڑی بارش ہونے کی توقع ہے۔جبکہ کیرالہ میں آئندہ دو دنوں تک تیز برسات ہونے والی ہے۔اس کے پیش نظر ایرناکولم، ایڈوکّی اور ملاپورم ضلعوں میں ’ایلو الرٹ‘ جاری کیا گیا ہے۔