منگلورومیں بیچ سڑک پر بھاری ٹرک پھنس جانے سے ٹریفک جام۔ ایئر پورٹ اور دفتروں کو جانے والے ہوگئے پریشان
منگلورو12/دسمبر (ایس او نیوز) شہر کے شربت کٹّے کے پاس ایک بھاری ٹریئلر ٹرک ایئر پورٹ جانے والی بیچ سڑک پر پھنس جانے کی وجہ سے صبح کے وقت ٹریفک جام ہوگیا جس کی وجہ سے ایئرپورٹ جانے والے مسافر بہت ہی زیادہ پریشان ہوگئے۔ اس کے علاوہ اسکول جانے والے طلبہ اور دفتروں میں ڈیوٹی پر جانے والے بھی بری طرح پھنس کر رہ گئے۔
موصولہ رپورٹ کے مطابق ٹریئلر ٹرک کے ڈرائیور نے ایئر پورٹ جانے والی مصروف ترین سڑک پرشربت کٹے کے پاس یو ٹرن لینے کی کوشش کی، مگر اس کا اندازہ غلط ہوگیااور وہ اتنے بھاری ٹرک کو موڑنے میں ناکام رہا۔ نتیجے کے طور پر دونوں طرف سے ٹریفک کے لئے راستہ بند ہوگیا۔ ایئر پورٹ جانے والے مسافر تاخیر کی وجہ سے بری طرح پریشان ہوگئے لیکن وہ سوائے ٹرک ڈرائیور کو کوسنے کے اور کچھ کر بھی نہیں سکتے تھے کہ اتنا وزنی ٹرک وہاں سے آسانی کے ساتھ ہٹانا ممکن ہی نہیں تھا۔اسکولی بچے اور دفتری ملازمین ایک دوسرے کا منھ دیکھنے کے علاو ہ کچھ کرنہیں پارہے تھے۔ اس دوران پولیس نے موقع پر پہنچ کر حالات کو قابو میں کرنے کی کوشش کی، لیکن کئی گھنٹے گزرنے کے بعد بھی ٹریفک کے لئے راستہ کھل نہیں سکا تھا۔
عوام کا کہنا ہے کہ ان سڑکوں پرجو شہر کے دفتری علاقوں، اسپتالوں، تعلیمی اداروں اور ایئر پورٹ کی طرف جاتی ہیں،وہاں دن کے مصروفیت والے اوقات میں بھاری ٹرک اور ٹریئلرس کو لے جانے پر پولیس کی طرف سے پابندی لگادی جانی چاہیے۔