منگلورو : بغیر لائسنس کی بندوقیں رکھنے والا ایک شخص ایئرپورٹ پر گرفتار
منگلورو، 2؍ دسمبر (ایس او نیوز) منگلورو ایئر پورٹ کی حفاظتی ڈیوٹی پر تعینات سنٹرل انڈیا سیکیوریٹی فورس (سی آئی ایس ایف) کے عملہ نے برہماور کے رہنے والے رینالڈ ڈیسوزا کو بغیر لائسنس کی بندوقیں اپنی کار میں رکھنے کے الزام میں گرفتار کر لیا ۔
موصولہ رپورٹ کے مطابق رینالڈ کا بہنوئی کویت سے ایئر انڈیا فلائٹ کے ذریعے آنے والا تھا جسے ریسیو کرنے کے لئے رینالڈ ایئر پورٹ پہنچا تھا ۔ اس نے اپنی کار پارکنگ ایئریا میں چھوڑی تھی ۔ سی آئی ایس ایف کے نوجوانوں نے دیکھا کہ اس کار میں دو دیسی بندوقیں رکھی ہوئی ہیں ۔ جب انہوں نے رینالڈ سے اس سلسلے میں تفتیش کی تو پتہ چلا کہ وہ دونوں بندوقیں بغیر لائسنس والی ہیں ۔ جس کے بعد رینالڈ کے خلاف کیس درج کرکے اسے گرفتار کرلیا گیا ۔ پھر عدالت میں پیشی پر اسے عدالتی حراست میں بھیجا گیا ۔
معلوم ہوا ہے کہ رینالڈ جنگلی جانوروں کے شکار پر گیا ہوا تھا اور وہاں سے واپس لوٹ کر وہ دیسی بندوقوں سمیت ایئر پورٹ پر آ گیا تھا ۔