منگلورو:مختلف مذاہب سے تعلق رکھنے والے نوجوان جوڑے کو ہراساں کرنے پر 3افراد گرفتار
منگلورو،16/نومبر (ایس او نیوز) منگلورو میں مول پولیسنگ ایک اور تازہ واقعہ پیش آیا ہے جس کے بعدشہر سے 17کلو میٹر دوری پر واقع موکّا ساحل پر چہل قدمی کررہے مختلف مذاہب سے تعلق رکھنے والے ایک جوڑے کو ہراساں کرنے اور لڑکے پٹائی کرنے کے الزام میں پولیس نے 3افراد کو گرفتار کرلیا ہے۔
بتایاجاتا ہے کہ کیرالہ سے تعلق رکھنے والا یہ جوڑا شام کو ایک ہوٹل میں کھانے کے بعد موکّا ساحل پر چہل قدمی کرنے کے نکلاتھا۔ لڑکی بی ڈی ایس کی طالبہ ہے اور لڑکا آپٹو میٹری(بینائی کی کیفیت اور چشمے کا نمبر معلوم کرنے کا علم)کا کورس کررہا ہے۔دونوں کا مذہب الگ ہے مگروہ ایک دوسرے کے دوست ہیں۔ جب یہ لوگ ساحل پر ٹہل رہے تھے تو ماہی گیروں کے ایک گروپ نے انہیں روک کر پوچھ تاچھ کی اور جب انہیں پتہ چلا کہ دونوں کے مذہب الگ ہیں تو وہ لوگ بھڑک اٹھے اور لڑکے پر مُکّے برسانے لگے۔ البتہ انہوں نے لڑکی کو ہاتھ بھی نہیں لگایا۔
لڑکے نے اپنے دوستوں اورکالج کے اساتذہ کو فون کرکے اس بات کی اطلاع دی تو ان کے کالج نے ڈین نے موقع پر پہنچ کر زخمی لڑکے کو اپنی حفاظت میں لیااور پھر اسے علاج کے لئے اسپتال میں داخل کیا گیا۔اس کے علاوہ کاسرگوڈ میں اس کے والدین کو بھی اس واقعے کی اطلاع دی گئی۔
اس معاملے کی اطلاع ملنے پرسورتکل پولیس کے افسران نے اسپتال پہنچ کر تفتیش کی۔ لڑکے یا لڑکی کی طرف سے کوئی بھی پولیس میں شکایت درج کروانے پر راضی نہیں تھا۔ مگر انہیں سمجھانے بجھانے کے بعد شکایت درج کرلی گئی۔پھر ایف آئی آر رجسٹرکرنے کے بعد پولیس نے موکا ساحل کے پاس سے سنیل، وسنت اور سوکیت نامی تین ماہی گیروں کو گرفتار کرکے عدالت میں پیش کیاجہاں سے ان کو عدالتی حراست میں بھیج دیا گیا۔پولیس نے بتایا ہے کہ مزید تحقیقات کے بعد ملزمین پر مناسب دفعات کے تحت کیس داخل کیا جائے گا۔ مزید ملزمین کی تلاش جاری ہے۔