منگلورو : پارٹ ٹائم کام دینے کے بہانے ایک شخص سے لوٹے گئے 1.34 لاکھ روپے
منگلورو ،23؍ دسمبر (ایس او نیوز) سائبر کرائم پولیس کے پاس ایک شخص نے شکایت درج کروائی ہے جس کے مطابق " فلپ کارٹ ریکروٹمنٹ پارٹم جاب" نامی لنک سے اس کو جزوی کام دینے کے نام پر 1.34 لاکھ کا دھوکہ دیا گیا ہے ۔
شکایت کنندہ کا کہنا ہے کہ اسے ایک لنک بھیجا گیا اور پارٹ ٹائم کام کرنے کے لئے اس لنک کو کھولنے کی ہدایت دی گئی ۔ جب اس نے لنک اوپن کرکے اپنا نام رجسٹر کروایا تو اس کے اکاونٹ میں 100 روپے جمع ہوگئے ۔ اس کے بعد ایک میسیج ملا جس میں کہا گیا کہ وہ اگر فون پے سے 200 روپے ادا کرے گا تو اسے یہ بتایا جائےگا کہ کس طرح فون پے ریچارجس سے پیسے کمائے جاتے ہیں ۔ اس شخص نے اس ہدایت کے مطابق 200 روپے ادا کر دئے ۔
اس کے بعد اسے ایک ٹاسک دیا گیا اور اسے مکمل کرنے پر اس کے فلپ کارٹ اکاونٹ میں 350 روپے جمع ہوگئے ۔ پھر اسے بتایا گیا کہ وہ 500 روپے کا ریچارج کروائے اور مزید رقم حاصل کرے ۔ اس طرح مختلف ٹاسک پورے کرواتے ہوئے مرحلہ وار اس سے 1,34,554 روپے ٹرانسفرکروائے گئے ۔
اس کے بعد ایک دن اسے میسیج ملا کہ اس کے فلپ کارٹ اکاونٹ میں 4,13,992 روپے جمع کیے گئے ہیں اور اس رقم کو نکالنے کے لئے اسے بطور ٹیکس 82,798 روپے ادا کرنے ہونگے ۔ اس موڑ پر اسے یقین ہوگیا کہ جز وقتی کام دینے کے دینے نام پر اس کے ساتھ دھوکہ ہوا ہے اور اس سے 1,34,554 ٹھگ لیے گئے ہیں ۔ تب اس نے پولیس سے رابطہ کیا اور شکایت درج کروائی ۔ پولیس اس معاملہ کی تحقیقات کر رہی ہے ۔