بنگلورو،7؍نومبر(ایس او  نیوز)شہر میں کانگریس کے نئے صدر ملکارجن کھرگے کا استقبال کرنے کیلئے کرناٹک پردیش کانگریس کمیٹی کی طرف سے ایک بہت بڑا پروگرام منعقد کیا گیا جس میں سرکردہ کانگریس رہنماؤں نے شرکت کی اور مسٹر کھرگے سے نیک خواہشات کا اظہار کرنے کے ساتھ ساتھ کانگریس کو اگلے انتخابات میں کامیابی کیلئے متحد ہو کر کام کرنا ہوگا-

مسٹر ملکارجن کھرگے نے اس موقع پر خطاب کرتے ہوئے اس بات پر زور دیا کہ کانگریس صدر بننے کے بعد انہیں تہنیت کا یہ پروگرام اس وقت ہونا چاہئے جب کانگریس کرناٹک میں اقتدار پر واپس آجائے-انہوں نے کہا کہ پارٹی کے ادے پور چنتن شویر میں جن قرار داوں کو منظور کیا گیا پارٹی صدر کے طور پر ان کی توجہ ان کو عملی جامہ پہنانے کی طرف مرکوز رہے گی-

مسٹر کھرگے نے کہا کہ پارٹی کی تمام محاذی یونٹوں کو پارٹی کے کاموں میں شامل کیا جائے اور ان کو پارٹی کی تنظیمی سرگرمیوں میں استعما ل کیا جائے - انہوں نے کہا کہ یہ ایک حقیقت ہے کہ میڈیا میں کانگریس کو جتنی تشہیر ملنی ہے وہ نہیں مل پارہی ہے -اس لئے پارٹی کارکن عوام سے رابطہ کرنے کیلئے گھر گھر پہنچ کر کام کریں - انہوں نے کہا کہ بھارت جوڑو یاترا کے ذریعے کرناٹک میں کانگریس کو جو مقبولیت حاصل ہوئی ہے اس کا آنے والے دنوں میں بہتر طریقہ سے استعمال کیا جائے-

ملک کیلئے کانگریس کی دین پر سوال اٹھانے والوں کو جواب دیتے ہوئے مسٹر کھرگے نے کہا کہ 1947میں جب ملک کو آزادی ملی اس وقت ملک میں کالجوں کی تعداد محض 400تھی آج ملک بھر میں 11لاکھ سے زیادہ کالجس موجود ہیں - صرف2لاکھ پرائمری اسکول تھے جو 2014میں 7لاکھ تک پہنچ گئے-محض 877ہائی اسکول تھے اب ایک لاکھ سے زیادہ ہیں محض 27 یونیورسٹیاں تھیں اب 723ہیں - شرح خواندگی 16فیصد تھی جو 2014میں 74فیصد تک پہنچ گئی-ملک میں محض 4لاکھ کلومیٹر کی سڑک تھی 54لاکھ کلومیٹر تک بڑھ گئی کیا یہ کارنامہ سے کم ہے - مرکز کی مودی حکومت کو نشانہ بناتے ہوئے مسٹر کھرگے نے گجرات کے موربی پل کا حوالہ دیا اور کہا کہ افتتاح کے پانچ دن بعد ہی اگر پل گرجائے تو اس سے صاف ظاہر ہو تا ہے کہ کام کس گھٹیا معیار کا ہوا ہو گا -

انہوں نے کہا کہ اس پل کے گرنے کیلئے کسی پر ذمہ داری کا تعین نہیں کیا گیا ہے - مودی حکومت نے کانگریس حکومت کی طرف سے شروع کئے گئے ہر کام میں رخنہ ڈال کر صرف ان کے نام بدلنے کا کام کیا - جھوٹ بول کر لوگوں کو گمراہ کیا او ر جب جھوٹ بے نقاب ہونے لگا تو فرقہ واریت کا زہر پھیلانے کا کام کر رہی ہے -راہل گاندھی نے جب سے بھارت جوڑو یاترا شروع کی ہے بی جے پی پر خوف طاری ہو گیا ہے - انہوں نے کہا کہ اگلے انتخابات میں تمام مل کر کام کریں اور بی جے پی کے پروپیگنڈہ کا منہ توڑ جواب دیں -