اُڈپی ضلع میں کیار طوفان کے نتیجےمیں 2ہلاک : گھروں کو نقصان ، بجلی کے کھمبے ، درخت زمین بوس
اُڈپی:25؍اکتوبر(ایس اؤ نیوز) اُڈپی ضلع میں موسلادھار بارش کے چلتے دو لوگ ہلاک ہونےکی اطلاعات موصول ہوئی ہیں۔ کاپو تعلقہ کے کورکالو دیہی پنچایت حدود کے کنجاروگری میں سولوچنا شریگار(42) اور کوکّہلی گرام پنچایت کے سانتے جڈو کے رویندر کمار کولال(38) ہی ہلاک ہونے والے افراد بتائے گئے ہیں۔
موصولہ اطلاعات کے مطابق سولوچنا شریگار جمعہ کی شام جانوروں کے لئے چارہ لانے گئی تھیں تو شنکر تیرتھ کے قریب پیر پھسل کر ہلاک ہوئی تھی جن کی نعش رات میں ملی۔ ایک دوسری طرف رویند کولال زوروں کی بارش سے بچنے کےلئے اپنےآٹو رکشا کو کنارے کھڑا کرکے اپنے شناسا دیواکر شٹی کے گھر کی صحن والی چھت کے نیچے کھڑے تھے تو درخت گر کر ہلاک ہونےکی بات کہی جارہی ہے۔ گزشتہ 24گھنٹوں میں ضلع میں 7.5سنٹی میٹر بارش ہوئی ہے۔ اُڈپی میں 8.3، کنداپور 8.6، کارکلا 5.3سنٹی میٹر بارش ہوئی ہے۔ کاپو اور اُڈپی تعلقہ جات کے کئی مقامات پر گھروں کو نقصان پہنچا ہے، درخت اور بجلی کے کھمبے زمین بوس ہوئے ہیں۔ فصلیں برباد ہوئی ہیں۔ بارش اور طوفانی ہواؤں کو دیکھتے ہوئے 26اکتوبر کو اسکولوں اور کالجوں میں چھٹی کا اعلان کیاگیا ہے۔