کنداپور میں چلتی کار اوور بریج سے سروس روڈ پر اُلٹ گئی؛ عید منانے کیرالہ جانے والی روزہ دار خاتون چل بسی ؛ شوہر اور لڑکا شدید زخمی
کنداپور 9/اپریل (ایس او نیوز) کنداپور اور اُڈپی کے درمیان نیشنل ہائی وے 66 کے اوور بریج سے تیزی کے ساتھ گذرنے کے دوران ایک کاربے قابو ہوکر اچانک نیچے سروس روڈ پر جاگری جس کے نتیجے میں ایک خاتون کی موت واقع ہوگئی جبکہ کار پر سوار دیگر دو لوگ شدید زخمی ہوگئے، زخمیوں کو منی پال اسپتال لے جایا گیا ہے۔ حادثہ کنداپور کے ایس آرٹی سی بس ڈپو کے سامنے واقع اوور بریج پر منگل کو پیش آیا۔
ذرائع سے ملی اطلاع کے مطابق خاتون اپنے شوہر اور اپنے بیٹے کے ساتھ ممبئی سے عید الفطر منانے کے لئے کنّور (کیرالہ ) جارہی تھی، جس کے دوران یہ حادثہ پیش آیا۔ حادثے میں کار پر سوار تینوں لوگ شدید زخمی ہوگئے تھے، جنہیں مقامی لوگوں کی مدد سے فوری اسپتال منتقل کیا گیا تھا، مگر اسپتال پہنچنے تک خاتون زخموں کی تاب نہ لاکر چل بسی۔
پتہ چلا ہے کہ خاتون روزہ سے تھی، زخمی ہونے والے شوہر اور بیٹا بھی روزہ سے ہیں، دونوں کو بھی شدید چوٹیں آئی ہیں اور منی پال اسپتال میں علاج جاری ہے۔
خاتون کا نام اور دیگر تفصیلات موصول ہونی باقی ہے۔