کاسرگوڈ : 3 منشیات فروش گرفتار ۔ 16 کلو گرام گانجہ دو موٹر کار ضبط
مینگلور 15/ جنوری (ایس او نیوز) پڑوسی ریاست کیرالہ کے کاسرگوڈ میں پولیس اور اینٹی نارکوٹکس سیل کی مشترکہ کارروائی کے بعد منشیات فروشی کے الزام میں 3 ملزمین کو گرفتار کیا گیا ہے اور ان کے قبضے سے 16 کلو گرام گانجہ اور دو موٹر کاریں ضبط کی گئیں ہیں۔
ذرائع سے ملی اطلاع کے مطابق سرحد سے لگے کونجاتھور منجیشور علاقہ میں پولس نے جب ایک کارکو روک کر تلاشی کی تو اس میں سے 4 کلو گرام گانجہ برآمد ہوا ۔ اس معاملہ میں گرفتار ہوئے شخص کا نام یاسین عمران (33 سال) بتایا گیا ہے ۔
دوسری ضبطی آدور پولیس اسٹیشن کے حدود میں ہوئی ہے جہاں ایک کار میں 12 کلو گرام گانجہ سپلائی کیا جارہا تھا ۔ یہاں پر آدور پولیس اور نارکوٹکس سیل کے افسران نے دو افراد کو گرفتار کیا ہے جن کے نام احمد کبیر (32 سال) اور عبدالرحمٰن صفوان (23 سال) بتائے گئے ہیں ۔