کاسرگوڈ : آن لائن منگوایا گیا کھانا کھانے سے طالبہ کی موت
مینگلور 8 / جنوری (ایس او نیوز) پڑوسی ریاست کیرالہ کے سرحدی ضلع کاسرگوڈ کے مضافات میں واقع ہوٹل سے آن لائن کھانا منگوانا ایک فیمیلی کے لئے مہنگا پڑا کیونکہ غذا کھانے کی وجہ سے نوجوان طالبہ کی موت واقع ہوگئی ۔
مہلوک طالبہ کی شناخت انجوشری (19 سال) کے طور پر کی گئی ہے جو کہ بی کام شعبہ میں زیر تعلیم تھی ۔ بتایا جاتا ہے کہ ہوٹل سے آن لائن منگوایا گیا کھانا کھانے کے بعد انجوشری اور اس کی ماں اور بھائی سمیت گھر کے افراد بیمار ہوگئے جنہیں اسپتال میں داخل کیا گیا ۔ انجوشری کی طبیعت بہت زیادہ خراب ہونے کی وجہ سے بعد میں اسے منگلورو کے اسپتال میں منتقل کیا گیا مگر علاج کارگر نہیں ہوا اور اس نے سنیچر صبح اسپتال میں دم توڑ دیا ۔
پتہ چلا ہے کہ انجوشری کے گھر کے دیگر افراد صحت یاب ہوگئے ۔ میلپرامبا پولیس نے اس ضمن میں کیس درج کیا ہے ۔ ریاستی وزیر صحت وینا جارج نے اس معاملہ کی مکمل تفتیش کرنے اور فوڈ سیفٹی کمشنر اور دوسرے ضلعی افسران سے ایمرجنسی رپورٹ پیش کرنے کا حکم دیا ہے ۔