جنتادل (ایس) این ڈی اے میں شامل ہونے کے بعد پی چدمبرم نے کہا؛ جس کا طویل عرصہ سے خدشہ تھا، وہ سچ ثابت ہوا
نئی دہلی،23/ستمبر(ایس او نیوز/ایجنسی) کرناٹک کے سابق وزیر اعلیٰ اور جے ڈی ایس لیڈر ایچ ڈی کمارسوامی کے مرکزی وزیر امت شاہ اور بی جے پی کے قومی صدر جے پی نڈا سے ملاقات کے بعد کانگریس نے ہفتے کے روز کہا کہ جس کا طویل عرصے سے خدشہ تھا آخر کار وہ سچ ثابت ہوا۔
کانگریس کے سینئر لیڈر پی چدمبرم نے ایکس (ٹوئیٹر) پر لکھا، ’’دیرینہ مشتبہ راز ظاہر ہو گیا ہے۔ بی جے پی نے سرکاری طور پر جے ڈی ایس کا این ڈی اے میں خیرمقدم کیا ہے۔ کرناٹک کی ایس سی، ایس ٹی، او بی سی، اقلیتی اور خواتین کو اس قدامت پسند، رجعت پسند اور خواتین مخالف پارٹیوں کی خبر لینی چاہئے جو پرانے نظام کو برقرار رکھنا چاہتی ہیں۔‘‘
جے ڈی ایس جمعہ کو 2024 کے لوک سبھا انتخابات سے قبل بھارتیہ جنتا پارٹی (بی جے پی) کی زیرقیادت قومی جمہوری اتحاد (این ڈی اے) کا حصہ بن گئی۔ اس سال مئی میں کرناٹک اسمبلی انتخابات میں کانگریس نے بی جے پی اور جے ڈی ایس کو شکست دے کر وہاں حکومت بنائی تھی۔
