کرناٹک کے نااہل ممبران اسمبلی کے ضمنی انتخابات لڑنے سے متعلق درخواست پر سپریم کورٹ کرے گا سماعت
نئی دہلی،23ستمبر(ایس او نیوز/آئی این ایس انڈیا) سپریم کورٹ نے کرناٹک کے نااہل ٹھہرائے گئے 17 ممبران اسمبلی کی 15 اسمبلی سیٹوں کے ضمنی انتخابات میں کھڑے ہونے کا مطالبہ سے متعلق عرضی پر سماعت کرنے کو لے کر پیر کو اتفاق جتایا۔جسٹس این وی رمن کی قیادت والی تین ججوں کی بنچ نے کہا کہ وہ نااہل ممبران اسمبلی کی درخواست پر 25 ستمبر کو سماعت کرے گی۔اس درخواست میں نااہل ممبران اسمبلی نے ضمنی انتخابات لڑنے کے لئے عبوری راحت کا مطالبہ کیا ہے۔نااہل ممبران اسمبلی کی جانب سے پیش سینئر وکیل مکل روہتگی نے بنچ سے کہا کہ ممبران اسمبلی کو نااہل ٹھہرانے کے اس وقت کے اسمبلی صدر کے آر رمیش کمار کے حکم کے مطابق یہ لوگ اس اسمبلی کی باقی مدت میں الیکشن نہیں لڑ سکتے، یہ مدت 2023 کو ختم ہوگی۔دریں اثنا، الیکشن کمیشن کے وکیل نے بنچ کو بتایا کہ 15 خالی اسمبلی سیٹوں کے ضمنی انتخابات مطلع کر دیئے گئے ہیں اور عدالت کو انتخابات پر روک نہیں لگانا چاہئے۔الیکشن کمیشن کے وکیل نے یہ بھی کہا کہ ممبران اسمبلی کو نااہل ٹھہرانے کا سابق اسمبلی اسپیکر کا حکم انہیں کرناٹک میں ضمنی انتخاب لڑنے کے ان کے حقوق سے محروم نہیں کر سکتا۔