بنگلورو، 13/ستمبر (ایس او نیوز/ایجنسی)کرناٹک میں ڈینگی  بخار کے معاملات میں ہورہے اضافہ کو دیکھتے ہوئے ، کرناٹک کے وزیراعلیٰ سدرامیا نے  محکمہ  صحت اور  بی بی ایم پی پر زور دیا ہے کہ وہ   وباء کی روک تھام کے لئے  مناسب اقدامات کریں۔ انہوں نے ہدایت دی ہے کہ  بنگلورو شہر میں مچھروں کے پھیلا ؤ کو روکنے باقاعدہ جھونپڑپٹی علاقوں اور گندہ پانی جمع ہونے والے علاقوں میں مچھر مار دواؤں کا چھڑ کاؤ کرے،  گندگی پھیلانے پر روک لگائے  اور پاکی صفائی اور کوڑا نکاسی پر خاص توجہ دی جائے۔

وزیر اعلیٰ سدارامیا نے ریاست کے عوام سے بھی   اپیل کی ہے کہ امسال شہر بنگلورو کے علاوہ ریاست بھر میں مچھروں سے پھیلنے والی وبا ڈینگی  بخار سے متاثر ہورہے لوگوں کی تعداد بڑھنے لگی ہے، عوام کو چاہئے کہ وہ  اس وبا سے خود کو بچانے کے لئے  احتیاط برتیں۔  وزیر اعلیٰ  نے سوشیل میڈیا کے ذریعہ عوام سے اپیل کرتے ہوئے لکھا کہ ریاست میں گزشتہ چند دنوں میں ہی 7000  سے زائد لوگ ڈینگی  بخار سے متاثر ہوئے ہیں، جن میں 4000 ہزار سے زائد معاملات بنگلورو شہر ہی میں پائے گئے ہیں۔ 

 انہوں نے  مکینوں سے کہا ہے  کہ اپنے گھروں کے اطراف گیلا کچرا اور کوڑا یا گندہ پانی جمع نہ ہونے دیں اور بخار کےآثار نظر آنے پر فوری ہیلتھ سینٹرس پر خود کی جانچ کروا کر تصدیق کر لیں کہ کہیں وہ ڈینگو بخار میں   مبتلا  تونہیں ہیں۔