17 ستمبر کو وزیراعلیٰ کا گلبرگہ دورہ؛ دستور ہند کی دفعہ جے371 کے موثر نفاذ کے لئے وزیر کرناٹک پریانک کھرگے کا تیقن
گلبرگہ31/اگست ( شاکر ایم اے حکیم/ایس او نیوز)دیہی ترقی اور پنچایت راج کے وزیر، آئی ٹی بی ٹی اورگلبرگہ ضلع انچارج منسٹر پریانک کھرگے نے لکشمن دستی کی قیادت میں کلیان کرناٹک سنگھرش سمیتی کے ایک وفد کو یقین دلایا ہے کہ چیف منسٹر سدرامیا، کلیان کرناٹک امرت مہااتسو تقریبات کے موقع پر 17/ ستمبر کو ڈیویژنل ہیڈکوارٹر کلبرگی پہنچیں گے۔
اس بات کا تیقن انہوں نے اُس وقت دیا جب کلیان کرناٹک سنگھرش سمیتی کے ایک وفد نے ضلع انچارج وزیر پریانک کھرگے سے ان کی رہائش گاہ پر ملاقات کی اور کلیان کرناٹک اتسو دیوس اور آئین کے آرٹیکل 371 جے کے مؤثر نفاذ کے بارے میں ایک تفصیلی تجویز پیش کی۔ اس موقع پر کمیٹی کے وفد کو یقین دلاتے ہوئے وزیر موصوف نے کہا کہ چیف منسٹر کلیان کرناٹک اتسو دیوس کے لئے 17/ ستمبر کو کلبرگی پہنچیں گے اور آرٹیکل 371 جے کے تحت فلاح و بہبود کے لئے تقرریوں اور ترقیوں سمیت خصوصی حیثیت کے استحقاق پر کابینہ کی ذیلی کمیٹی میں تبادلہ خیال کیا جائے گا اور اس خصوص میں مناسب فیصلہ لیا جائے گا. انہوں نے یقین دلایا کہ فلاح و بہبود کے ماہرین کے اجلاس کی تاریخ جلد از جلد طے کی جائے گی۔