نئی دہلی / بنگلورو،10جنوری(آئی این ایس انڈیا)کرناٹک کے وزیراعلیٰ بی ایس یڈی  یورپا نے اتوار کے روز وزیر داخلہ امیت شاہ سے ریاست کی سیاست پر تبادلہ خیال کرنے اور ریاست میں آئندہ ضمنی الیکشن کے لیے بی جے پی کے امیدواروں کا فیصلہ کرنے کے لیے ملاقات کی ۔

یاد رہے کہ یڈی  یورپا ایک دن کے دورے پر قومی دارالحکومت دہلی پہنچے تھے۔ یڈی  یورپا نے اس سے قبل بنگلورومیں دہلی جانے سے پہلے اشارہ دیا تھا کہ ریاستی  کابینہ میں ردوبدل پر بھی ان کی میٹنگ کے دوران تبادلہ خیال کیا جاسکتا ہے۔ یڈی یورپا نے دہلی پہنچنے کے بعد صحافیوں کوبتایا  کہ وہ  کرناٹک کی سیاسی صورتحال پر بات کریں گے۔

انہوں نے کہا  کہ حال ہی میں ہم نے گرام پنچایت انتخابات میں بڑی کامیابی حاصل کی۔ ایک ماہ کے اندر، ہم پارلیمانی ضمنی انتخاب اور اسمبلی ضمنی انتخاب کا سامنا کرنے جارہے ہیں۔ ہمیں امیدوار کا فیصلہ کرنا ہے۔ ہم امیت شاہ اور دیگرممتازرہنماؤں سے ان تمام امور پر تبادلہ خیال کریں گے۔

یڈی  یورپا  نے کہا  کہ وزیر داخلہ کے ساتھ ملاقات طے شدہ ہے۔ انہوں نے کہا  کہ وہ پارٹی کے قومی صدر رہے ہیں۔ ہم جے پی نڈا سے بھی ملنے کی کوشش کریں گے۔ریاست میں کووویڈ 19 کے پھیلاؤ کو روکنے کے لیے اٹھائے جانے والے اقدامات کے بارے میں پوچھے جانے پر وزیراعلیٰ نے کہا  کہ کرناٹک میں کوویڈ 19 کی صورتحال قابومیں ہے۔ہم تمام احتیاطی تدابیر اختیار کر رہے ہیں۔

قبل ازیں انہوں نے بنگلوروکے ہوائی اڈے سے نکلنے سے پہلے پارٹی ہائی کمان سے بات چیت کے دوران، کابینہ میں توسیع کا معاملہ بھی سامنے لانے کا اشارہ کیا۔ایئرپورٹ پر نامہ نگاروں کے ذریعہ یہ پوچھے جانے پر کہ کیا اس ہفتے کابینہ میں ردوبدل کا امکان ہے، انہوں نے کہا  کہ مجھے نہیں معلوم۔میں تمام امور پر تبادلہ خیال کروں گا۔