کمٹہ کے جے ڈی ایس لیڈر سورج نائک سونی ہو سکتے ہیں کانگریس میں شامل
کمٹہ، 12/ مارچ (ایس او نیوز) گزشتہ اسمبلی انتخاب کے دوران کمٹہ سے جے ڈی ایس کی ٹکٹ پر الیکشن لڑنے والے سورج نائک سونی کے بارے میں خبر گرم ہے کہ وہ اب جے ڈی ایس سے الگ ہو کر کانگریس میں شامل ہونے کا ارادہ رکھتے ہیں ۔
باوثوق ذرائع کا کہنا ہے کہ اسی ہفتے جمعہ کے دن بینگلورو میں کانگریس پارٹی کے دفتر میں سورج نائک سونی باضابطہ طور پر کانگریس میں شامل ہونے کاامکان ہے ۔
سورج نائک سونی ضلع میں ایک نوجوان اور متحرک سیاسی چہرا ہے ۔ گزشتہ اسمبلی الیکشن میں بہت ہی کم ووٹوں سے انہیں شکست کا سامنا کرنا پڑا تھا ۔ سمجھا جاتا ہے کہ اس شکست کے بعد بھی ان کے حامیوں کی تعداد میں کوئی کمی نہیں آئی ہے بلکہ اس میں مزید اضافہ ہوا ہے ۔
بعض حلقوں کا کہنا ہے کہ سونی کے حامیوں نے پارلیمانی الیکشن میں انہیں امیدوار بنانے کے لئے سوشیل میڈیا پر مہم چلائی ہے اور خود سورج نائک سونی بھی کسی بھی پارٹی میں شامل ہونے کے لئے پارلیمانی الیکشن میں ٹکٹ کا وعدہ چاہتے ہیں ۔
اب دیکھنا یہ ہے کہ جمعہ کے دن سورج نائک کانگریس میں غیر مشروط طور پر شامل ہوتے ہیں یا کسی شرط کے ساتھ ان کی شمولیت ہوتی ہے یا پھر یہ محض ایک افواہ ثابت ہوتی ہے ۔