نئی دہلی   26مئی (ایس او نیوز/آئی این ایس انڈیا)   وائی ایس آر کانگریس کے سربراہ جگن موہن ریڈی نے وزیر اعظم نریندر مودی سے اتوار کو دہلی میں ان کی رہائش گاہ پر ملاقات کی۔اس کے بعد انہوں نے بغیر کسی طے پروگرام کے بی جے پی کے قومی صدر امت شاہ سے ملاقات کی۔ ان دونوں ملاقاتوں کے بعد دہلی میں  واقع آندھرا ہاؤس میں انہوں نے ایک پریس کانفرنس  میں صحافیوں سے خطاب کرتے ہوئے کہا کہ بی جے پی اگر 250 سیٹیں جیتی ہوتی تو آج حالات کچھ اور ہوتے۔ ایسے میں بغیر کسی شرط کے وائی ایس آر کانگریس کو  حمایت نہیں دیتی۔

جگن کے مطابق ان کی پارٹی این ڈی اے کو حمایت دیتی لیکن اسپیشل کٹیگری اسٹیٹس کاغذات پر دستخط کرنے کے بعد ہی ایسا ہو پاتا۔ریڈی کی پارٹی وائی ایس آر کانگریس کو آندھرا پردیش اسمبلی انتخابات میں 175 نشستوں میں سے 151 سیٹوں پر اور لوک سبھا کی 25 سیٹوں میں سے 22 سیٹوں پر زبردست کامیابی حاصل ہوئی ہے۔ اتوار کو دہلی پہنچے ریڈی نے وزیر اعظم نریندر مودی سے ملاقات کے دوران آندھرا پردیش کو خصوصی ریاست کا درجہ دینے، ریاست کی اقتصادی حالت اور مرکز سے فنڈ دیئے جانے جیسے مسائل پر بات چیت کی۔