بھٹکل 22 / فروری (ایس او نیوز) بھٹکل تعلقہ ہاسپٹل کی میڈیکل آفیسر اور ٹی ایچ او ڈاکٹر سویتا کامت کے ہاتھوں ساگر روڈ پر گرو سدھیندرا کالج کے قریب 'وائٹل الائن فزیو تھیراپی' سینٹر کا افتتاح عمل میں آیا ۔
اس موقع پر بولتے ہوئے ڈاکٹر سویتا کامت نے کہا کہ یہ فیزیو تھیراپی سینٹر مریضوں کے لئے ایک تحفہ کی طرح ہے ۔ عمل جراحی کے بعد، حادثات کی وجہ سے یا پھر فالج اور لقوہ کی وجہ سے معذور ہونے والے اعضاء کو درست کرنے میں فیزیو تھیراپی کا اہم ترین رول ہوتا ہے ۔ اس لئے اس فیزیو تھیراپی سینٹر سے بہت سارے لوگوں کے لئے سہولت ہوگی ۔
مہمان خصوصی کے طور پر موجود ڈاکٹر لکشمیش نائک نے بھی فیزیو تھیراپی کی ضرورت اور اہمیت پر روشنی ڈالی ۔ اس کے علاوہ بھاسکر نائک کائکینی، سوشیل ورکر نریندرا نائیک، صحافی رادھا کرشنا بھٹ، سوشیل ورکر نذیر قاسمجی وغیرہ نے بھی اپنے تاثرات پیش کیے ۔
اس موقع پر وائٹل الائن فیزیو تھیراپی کے ڈاکٹر دھنیا پربھو نے فیزیو تھیراپی اور اس مرکز میں دستیاب مختلف مشینوں کے تعلق سے تفصیلی معلومات پیش کیں ۔