ہوناور،18؍مئی (ایس او نیوز) کنڑا اخبار میں شائع ایک خبر کے مطابق ریاستی حکومت کے لیبر ڈپارٹمنٹ کی طرف سے مزدوروں کے لئے راشن کٹس فراہم کیے گئے تھے، لیکن ان کٹس پر تقسیم کے وقت رکن اسمبلی سنیل نائک کی تصویر چسپاں کیے جانے پر عوام کی طرف سے اعتراض جتایا جارہا ہے۔ 

 بتایا جاتا ہے کہ لیبر ڈپارٹمنٹ اور ضلع انچارج وزیرشیورام ہیباراور وزیراعلیٰ ایڈی یورپا کی طرف سے لاک ڈاؤن کی وجہ سے مشکل میں پھنسے ہوئے مزدوروں کے لئے راشن کٹس فراہم کیے تھے۔ ریاست کے تمام اسمبلی حلقوں کے لئے یہ انتظام کیا گیا تھا۔ بھٹکل اسمبلی حلقے کے لئے 3ہزار اور کمٹہ اسمبلی حلقے کے لئے 4ہزار کٹس فراہم کیے گئے تھے۔

تعجب کی بات:حکومت کی عوامی اسکیموں کے تحت لوگوں میں تقسیم کی جانے والی اشیاء پر ریاستی وزیر اعلیٰ اور متعلقہ محکمہ کے وزیر کی تصویر چسپاں کرنا عام بات ہے۔  لیکن لیبر ڈپارٹمنٹ کی طرف سے اب کی بار جو کٹس تقسیم کیے گئے اس پر وزیراعلیٰ یا لیبر ڈپارٹمنٹ کے وزیر کی تصویر موجود نہیں تھی۔ مگر عوام کو تعجب اس با ت پر ہوا کہ بھٹکل اسمبلی حلقے میں جو کٹس تقسیم کی گئیں اس پر لیبر ڈپارٹمنٹ کے اسٹیکر کے ساتھ وزیرا علیٰ ایڈی یورپا اور مقامی ایم ایل اے سنیل نائک کی تصویر چسپاں تھی۔

اس سے بھی بڑی حیران کن بات یہ سننے میں آئی ہے کہ لیبر ڈپارٹمنٹ کا عطیہ ہونے کے باوجود یہاں پر کٹس تقسیم کیے جانے کی بات مقامی یا ضلع لیبر  ڈپارٹمنٹ کے علم میں نہیں لائی گئی اور نہ ہی کسی افسر کو اس موقع پر وہاں حاضر رہنے کے لئے بلایا گیا۔

مزدور یونین صدر کا اعتراض:مزدوروں کی یونین(سی آئی ٹی یو) کے ضلع صدر تلک جی گوڈا نے اپنا اعتراض جتاتے ہوئے کہا کہ رکن اسمبلی نے فوٹوگرافروں اور شامیانہ مزدوروں کو کٹس تقسیم کیے اس پر مجھے کوئی اعتراض نہیں ہے، لیکن تعمیراتی مزدور اور قلی کا کام کرنے والے مزدور بھی اتنی ہی مشکلوں سے گزر رہے ہیں۔ ان کو نظر انداز کیا گیا ہے۔ اعتراض اس بات پر بھی ہے کہ سرکاری امداد کی تقسیم کے لئے ایم ایل اے نے اپنے کارکنان کو استعمال کیا ہے اور انہی کی طرف سے نشاندہی کیے گئے افراد کو امداد دی گئی ہے۔ اس کے علاوہ سرکاری امداد کو ایم ایل اے کی طرف سے اپنی عمارت میں ذخیرہ کرکے رکھا جاتا ہے، جو انتہائی قابل اعتراض بات ہے۔ 

ضلع انچارج وزیر کی صفائی:لیبر ڈپارٹمنٹ اور ضلع انچارج وزیر شیورام ہیبار نے صفائی دیتے ہوئے کہا ہے کہ رکن اسمبلی کی طرف سے لیبر ڈپارٹمنٹ کی کٹس پر اپنی تصویرچسپاں کرنا مناسب بات نہیں ہے۔ جیسے ہی یہ بات میرے علم میں آئی، میں نے انہیں ایسی حرکت کرنے سے منع کردیا ہے۔

    کنڑا اخبار کا کہنا ہے کہ اس سلسلے میں جب بھٹکل رکن اسمبلی سے تبصرہ کے لئے فون پر رابطہ کرنے کی کوشش کی گئی تو انہوں نے فون ریسیو نہیں کیا۔