بنگلورو 30/مئی (ایس او نیوز) پچھلے دو تین دن سے بنگلورو میں شام کے وقت زورداربارش ہورہی ہے جس کے نتیجے میں بجلی منقطع ہونے کے علاوہ درخت جڑ سے اکھڑ گرنے اور اس سے موٹر گاڑیوں کو نقصان پہنچنے کی بھی اطلاعات موصول ہوئی ہیں۔
ذرائع سے ملی اطلاع کے مطابق جمعرات اور جمعہ کے دن بنگلورو مغربی علاقے میں تیز ہواؤں اور بجلیوں کی کڑک اور بادلوں کی گرج کے ساتھ زوردار برسات ہوئی۔تقریباً 30سے زائد مقامات پر درخت جڑوں سے اکھڑ گئے۔ پریس کلب کے احاطے میں بھی درخت اکھڑ کر گئے۔فائر بریگیڈ اورمیونسپل کارپوریشن کے عملے نے درختوں کو ہٹانے کا کام انجام دیا۔ملیشور، شیشادری پورم، راجاجی نگر، مہا لکشمی لے آؤٹ، کورمنگلا، بسویشور نگر، اندرا نگر، ایم جی روڈ، شیواجی نگر اور آس پاس کے علاقوں میں بھاری برسات ہونے کی خبر ہے۔کئی علاقوں میں برسات کا پانی جمع ہونے سے لوگوں کے لئے آمد و رفت میں مشکلات پیش آئیں۔
موسلادھار برسات کے دوران درخت کی شاخیں ٹو ٹ کر الیکٹرک کھمبے پر گرگئیں جس کی وجہ سے بجلی منقطع ہوگئی۔جبکہ ملیشور، راجاجی نگر، ودیا رنیا پور جیسے علاقوں میں درخت موٹر گاڑیوں پر گئے جس سے کاروں اور آٹو رکشا کو بہت نقصان پہنچا ہے۔