ہلیال : ایس ایل گھوٹنیکر پر جعلی دستاویزات پیش کرکے 40لاکھ روپیوں کا قرضہ لینے کا الزام : پولس تھانے میں شکایت درج
ہلیال:27؍ مارچ (ایس اؤ نیوز ) سابق رکن پریشد ایس ایل گھوٹنیکر پر جعلی دستاویزات تیارکرکے 40لاکھ روپئے کا قرضہ لے کر اپنے نجی اکاؤنٹ میں جمع کرنےکا الزام عائد کرتےہوئے ہلیال پولس تھانے میں شکایت درج کی گئی ہے۔ چھترپتی شیواجی ایجوکیشن ٹرسٹ کے صدر رائینا ایس ارسینگیری نے 24مارچ کو ایس ایل گھوٹنیکر کے خلاف شکایت درج کرائی ہے۔
سابق ودھان پریشد کے رکن ایس ایل گھوٹنیکر جنہوں نے کانگریس کا ہاتھ چھوڑ کر جے ڈی ایس میں شامل ہوئے ہیں، اور اگلے ودھان سبھا انتخابات میں جے ڈی ایس کے امیدوار کی ٹکٹ پر انتخابات لڑنے کے امکانات ہیں، مگر ایسا لگتا ہے کہ پرانے معاملات کو کھود کر ان کو گھیرنے کی تیاری کی جارہی ہے تاکہ وہ انتخابات میں پوری طرح سرگرمی نہ دکھا سکیں۔ بتایاجارہاہے کہ 2015میں ایس ایل گھوٹنیکرنے شری چھترپتی شیواجی ایجوکیشن ٹرسٹ کے نام پر ہلیال کی شری چھترپتی شیواجی ملٹی پرپز سہکاری سنگھ سے40لاکھ روپیوں کا قرضہ لیا تھا۔ منظوری کے بعد پوری رقم اپنے نجی کھاتےمیں منتقل کرانے کی بات شکایت میں کہی گئی ہے۔
شکایت میں کہاگیا ہے کہ ایس ایل گھوٹنیکر نے ہلیال سب رجسٹرار آفس میں جعلی دستاویزات اور جعلی سیل تیارکرکے دستخط کئے ۔ پھر انہی جعلی دستاویزات کی بنیاد پر سنگھا سے 40لاکھ روپیوں کا قرضہ لیا۔اور قرضہ کےلئے بطور ضمانت شری چھترپتی شیواجی ایجوکیشنل ٹرسٹ کےجعلی دستاویزات بطور ضمانت رکھے۔ قرضہ کی رقم کو اپنے لئے استعمال کرنےکا رائینا نے الزام لگایا ہے۔ مقامی پولس تھانے کے افسران نےشکایت درج کرلی ہے اور جانچ جاری ہے۔