مکہ،مدینہ،19/جون(ایس او نیوز؍ایجنسی)دنیا کے مختلف ممالک سے اب تک 11 لاکھ سے زیادہ عازمین حج کی ادائیگی کیلئے ہوائی، زمینی اور سمندری راستوں سے مدینہ منورہ پہنچ چکے ہیں -ادھر مسجد حرام میں عازمین حج کی آسانی کیلئے 15 زبانوں میں خدمات فراہم کی جا رہی ہیں - مسجدحرام میں خواتین کیلئے زبانوں اور ترجمہ کے اسسٹنٹ انڈر سکریٹری دلال فلاتہ نے کہا ہے کہ حجاج کرام کی میزبانی کیلئے 15 زبانوں میں ماہر رضاکارانہ مواقع فراہم کئے گئے ہیں -

انہوں نے سعودی چینل کے ساتھ انٹرویو میں مزید کہا کہ، یہ خواتین کے اندرونی مصلیٰ اور بیرونی سہولیات کی تیاری کیلئے کی جانے والی کوششوں میں شامل ہے، تاکہ عبادت کیلئے آنے والی خواتین کو مکمل رہنمائی اور آسانی فراہم کی جائے-سعودی وزارت حج وعمرہ کے سکریٹری محمد البیجاوی نے کہا ہے کہ مختلف ممالک سے اب تک11لاکھ سے زیادہ عازمین حج سعودی عرب پہنچ چکے ہیں -

وزارت حج وعمرہ کے سکریٹری نے مزید کہا کہ بری، بحری اور فضائی راستوں سے عازمین کی آمد کا سلسلہ ابھی جاری ہے-سعودی پریس ایجنسی(ایس پی اے)نے سعودی حج اور سیاحتی کمیٹی کی جانب سے جاری اعدادوشمار سے متعلق رپورٹ جاری کی ہے جس میں تفصیلات بتائی گئی ہیں کہ ہفتہ کے روز حج پروازوں کے ذریعے کل 29,090 عازمین حج مدینہ منورہ پہنچے ہیں جن میں سے 25,962 عازمین کرام مدینہ کے شہزادہ محمد بن عبدالعزیز انٹرنیشنل ایئرپورٹ پر اترے ہیں -

اعدادوشمار کی جاری اس رپورٹ میں یہ بھی بتایا گیا ہے کہ ہفتے کے روز 556,953 عازمین مقدس مقامات کی زیارت کیلئے مکہ مکرمہ روانہ ہوئے جب کہ مدینہ منورہ میں مقیم عازمین کی تعداد 161,021 ہوگئی ہے- انہوں نے مزید کہا کہ مدینہ منورہ میں رہائش کی گنجائش 54 فیصد تھی جب کہ 32,631عازمین نے یہاں طبی خدمات سے استفادہ بھی کیا-

واضح رہے کہ مدینہ منورہ میں حکام مناسک حج کی ادائیگی کیلئے عازمین کرام کو بہترین سہولیات فراہم کرنے کیلئے24گھنٹے خدمات سر انجام دے رہے ہیں -