کاروار 11/ اپریل (ایس او نیوز)گزشتہ پانچ چھ دن سے کرناٹکا روڈ ٹرانسپورٹ کارپوریشن کے ملازمین اپنے مطالبات پورے ہونے تک غیر معینہ مدت کی ہڑتال کر رکھی ہے اور حکومت کی طرف سے دی گئی  ڈیوٹی پر حاضر ہونے کی ہدایت پر عمل کرنے کے لئے تیار نہیں ہورہے ہیں ، اس پر حکومت نے بھی اب تادیبی کارروائی کا سلسلہ شروع کردیا ہے۔

    موصولہ رپورٹ کے مطابق بطور سزا اب عملہ کو کارپوریشن کے مختلف شعبہ جات میں ٹرانسفر کیا جا رہا ہے۔ اب تک ٹریفک سے متعلقہ 153 اور ٹیکنیکل شعبہ سے 51 اسامیوں کا تبادلہ الگ الگ شعبہ جات میں کر دیا گیا ہے۔ اس میں سرسی، دھارواڑ زون  میں شامل ڈانڈیلی ڈپو سے تعلق رکھنے والے 120 ملازمین شامل ہیں۔