کاروار 13/فروری (ایس او نیوز) ضلع اُترکنڑا کے انکولہ میں ایک تیز رفتار ٹینکر کسی سواری کو اوورٹیک کرنے کی کوشش میں مخالف سمت سے آنے والی ایک کار سے ٹکراگئی، جس کے نتیجے میں کار پر سوار چار لوگ ہلاک ہوگئے۔ حادثے میں ایک لڑکی شدید زخمی ہوئی ہے جسے کاروار اسپتال میں داخل کیا گیا ہے۔ حادثہ بدھ کی شام قریب نو بجے پیش آیا۔

ذرائع نے بتایا کہ کار پر سوار  بنگلور کے افراد کاروار جارہے تھے کہ انکولہ کے ہارواڑ نیشنل ہائی وے پرحادثہ پیش آیا۔ بتایا گیا ہے کہ  ٹئینکر کسی سواری کو اوورٹیک کرتے ہوئے تیز رفتاری کے ساتھ  مخالف سمت سے آنے والی ان کی کار سے ٹکراگئی۔ عینی شاہدین نے بتایا کہ ٹکر مارنے کے بعد بے قابو  ٹینکر  اُسی رفتار کے ساتھ کار کو سو میٹر دور تک کھینچتے ہوئے  لے گئی۔

حادثے میں تین لوگوں کی موقع پر ہی موت واقع ہوگئی، البتہ ایک شخص نے کاروار اسپتال پہنچنے کے بعد دم توڑ دیا۔ حادثے میں ایک لڑکی شدید زخمی ہوئی ہے جسے کاروار ڈسٹرکٹ اسپتال منتقل کیا گیا ہے۔

مرنے والوں کی شناخت بنگلور ڈوڈاونلّا کا رہنے والا رمیش کرشنپّا (30)، ڈودبلّاپور کی مینا عرف میناکشی (30)، بنگلور راجہ گوپال نگر کی  پربھاوتی چیکّے گوڈا(35) اور بنگلور گوٹّی گیری کے رہنے والے  ونئے وینکٹ رامنپّا (39) کی حیثیت سے کی گئی ہے۔

انکولہ پولس تھانہ میں معاملہ درج کیا گیاہے اور پولس مزید چھان بین کررہی ہے۔