منگلورو،14؍جولائی (ایس او نیوز) دکشن کنڑا ضلع کے منگلورو میں کشتی میں تکینکی خرابی کی وجہ سے پیر کو گہرے سمندر میں پھنسے 4 ماہی گیروں کو بچایا گیا۔محکمہ موسمیات کی جانب سے وارننگ جاری کرنے کے باوجود ماہی گیر سمندر میں چلے گئے تھے۔

ذرائع نے بتایا کہ اتوار کے روز ماہی گیر اُلال کوڈی کے رہنے والے ایک شخص کی کشتی میں سوار ہو کر سمندر میں گئے تھے۔ واپسی کے دوران کشتی میں تکینکی خرابی کی وجہ سے تمام ماہی گیر گہرے سمندر میں پھنس گئے۔ صبح ان کی مدد کے لئے مجیشور سے ایک فیری بھیجی گئی۔ ان کی کشتی کو ٹھیک کرنے کے بعد تمام ماہی گیروں کو واپس کنارے لایا گیا۔ اس بچاؤ مہم میں اُلال پولیس کی جانب سے بھی مدد کی گئی تھی۔