دبئی جانے والوں کے لئے ویکسینیشن سرٹفکیٹ لازمی نہیں
دبئی،12؍ اگست (ایس او نیوز) اخبار خلیج ٹائمز کے حوالہ سے یہ خبر سامنے آئی ہے کہ اب ہندوستان ، پاکستان، سری لنکا اور نیپال سے دبئی واپس لوٹنے والے وہ افراد جن کے پاس دبئی کی رہائشی ویزا ہو اور انہوں نے کووڈ نگیٹیو رپورٹ کے ساتھ جی ڈی آر ایف سے توثیق کروالی ہو تو انہیں اپنے ساتھ ویکسینیشن سرٹفکیٹ رکھنا لازمی نہیں ہے ۔ البتہ یہ رعایت پورے عرب امارات (یو اے ای) کے لئے نہیں ہے بلکہ صرف دبئی جانے والوں کے لئے ہے ۔
ایمیریٹس ایئر لائنس کی سپورٹ ٹیم نے 'تازہ ترین اپڈیٹ' کا حوالہ دیتے ہوئے اس بات کی تصدیق کی ہے اور کہا ہے کہ مسافروں کے لئے مندرجہ ذیل دیگر سفری ضوابط پورا کرنا کافی ہے :
- پابندیاں لگے ہوئے ممالک سے یو اے ای کی رہائشی ویزا رکھنے والے تمام مسافروں کو دبئی آنے کی اجازت رہے گی بشرطیکہ وہ لوگ سفر شروع کرنے سے پہلے جنرل ڈائریکٹوریٹ آف ریسیڈنسی اینڈ فارین افیئرس (جی ڈی آر ایف اے) سے توثیق کے لئے درخواست دیں ۔
- مسافروں کے پاس کووڈ پی سی آر ٹیسٹ نگیٹیو آنے کی سرٹفکیٹ ہو جو ٹیسٹ اور سفر کے لئے اڑان بھرنے کے درمیان 48 گھنٹے کے وقفہ کے اندر حاصل کی گئی ہو ۔ جانچ لیباریٹری کا کیو آر کوڈ سرٹفکیٹ پر ہونا لازمی ہے۔
- مسافر کے لئے طیارہ اڑان بھرنے سے 4 گھنٹہ قبل کووڈ پی سی آر ٹیسٹ کا عمل پورا کرنا ضروری ہوگا ۔ ریپیڈ اینٹیجن ٹیسٹ رپورٹ قبول نہیں کی جائے گی ۔
- مسافروں کو دبئی پہنچنے کے بعد کووڈ پی سی آر ٹیسٹ کروانا ہوگا ۔
بتایا گیا ہے کہ ایئر لائنس کے نمائندے چیک اِن ممالک میں مندرجہ بالا نکات کی جانچ کریں گے اور مسافر کی ویکسینیشن ہونے یا نہ ہونے پر توجہ نہیں دیں گے ۔
خلیج ٹائمز کا کہنا ہے کہ ابوظہبی میں قائم اتجاد ایئرویز کے ذرائع نے بتایا ہے کہ ہندوستان، پاکستان، بنگلہ دیش ، سری لنکاکے وہ مسافر جن کے پاس رہائشی ویزا ہو اور وہ ابوظہبی جانا چاہتے ہوں تو انہیں یو اے ای کے اندر ہی سفر کے کم از کم چودہ دن پہلے کووڈ ویکسینیشن کے دونوں ڈوز مکمل ہونے کا ثبوت اپنے ساتھ رکھنا ہوگا ۔